Azərbaycan, Bakı, 11 mart / Trend , müxbir S.İlhamqızı/ Azərbaycan Demokrat Partiyasının sədri Sərdar Cəlaloğlu müxalifəti prezident seçkisi ilə əlaqədar qətiyyətli olmamaqda günahlandırır.
"Müxalifətin bu ləngliyi, özünü qeyri-müəyyən vəziyyətdə saxlaması iqtidarın xeyrinədir"-deyə Cəlaloğlu çərşənbə axşamı Trend ə açıqlamasında bildirib.
Bu ilin oktyabrında Azərbaycanda keçiriləcək prezident seçkisində müxalifət düşərgəsindən ADP, Müsavat, Ümid partiyaları öz namizədi ilə iştirak etmək barədə qərar çıxarıb. 10-dan çox müxalifət partiyasının seçkidə iştirak edib-etməmək barədə hələlik qərarı yoxdur. Müxalifətçi AXCP, ALP, VİP-i birləşdirən "Azadlıq" bloku hələlik seçkini boykot etmək yolunu tutub.
Cəlaloğlu bildirib ki, seçkiyə az vaxt qalıb və müxalifət düşərgəsi prezident seçkisində hansı formada, neçə nəfər namizədlə iştirakını, yaxud blok və ya koalisiyalar şəklində iştirak edib-etməyəcəyini müəyyənləşdirməlidir: "Amma müxalifət partiyaları belə ləng hərəkət etməklə çox böyük səhvə yol verir. Çünki bu qərarsızlıq, qeyri-müəyyənlik həm cəmiyyətin passivləşməsinə səbəb olur, həm də iqtidarın şansını artıran amilə çevrilir"-deyə ADP sədri bildirib.
O əlavə edib ki, ADP-nin prezident seçkisində öz namizədini irəli sürməsi barədə qərarı qətidir və seçkidə sonadək iştirak edəcək.
Sağ təmayüllü, müxalifət partiyası ADP 1991-ci ildə Cəlaloğlu tərəfindən təsis edilib. 2007-ci ilin yanvarında ADP-nin hakimiyyətlə dialoq qurulması ilə bağlı yeni siyasi kursu qəbul edilib. Ötən ay partiyanın Ali Məclisi Cəlaloğlunun prezidentliyə namizəd olması barədə qərar çıxarıb.