Azərbaycan, Bakı, 11 mart / Trend , müxbir K.Ramazanova/ Venesiya Komissiyası Azərbaycanın Seçki Məcəlləsində dəyişikliklər barədə birgə qərarın müvəqqəti layihəsini qəbul edəcək. Sənədə Komissiyanın martın 14-15-də İtaliyda keçiriləcək 74-cü plenar sessiyasında baxılacaq. Bu barədə Komissiyanın bazar ertəsi yayılan məlumatında bildirilir.
Cari ildə nəzərdə tutulan prezident seçkisi öncəsi Azərbaycanın Seçki Məcəlləsinin təkmilləşdirilməsi üzrə müzakirələr aparılır. Seçki Məcəlləsinin yeni variantı Azərbaycan Parlamentinə təqdim olunub.
Noyabrın əvvəlində Bakıda Venesiya Komissiyası, ATƏT, hökumət və ilk dəfə olaraq Azərbaycanın siyasi partiya nümayəndələrinin iştirakı ilə Dəyirmi masa keçirilib. Görüş zamanı seçki komissiyalarının tərkibi və seçki prosesi ilə bağlı şikayətlərin həlli məsələləri müzakirə olunub.
Azərbaycanın fəaliyyətdə olan Seçki Məcəlləsinə müvafiq olaraq, şikayətlərə ali seçki komissiyaları və məhkəmələr baxır. Venesiya Komissiyasının nümayəndələri şikayətlərə baxma müddətini qısaltmağı təklif edirlər.
Məcəllə üzərində işin payıza qədər başa çatdırılması planlaşdırılmışdı. Lakin proses seçki komissiyaları tərkibinin formalaşdırılması ilə bağlı müxalifət partiyalarının mövqeyi səbəbindən uzanıb. Üç müxalifət partiyasını özündə birləşdirən "Azadlıq" bloku iyun ayında Azərbaycanın Seçki Məcəlləsinə düzəlişlər və əlavələrə dair təkliflər paketini Venesiya Komissiyasına göndərib. Burada paritet əsaslarla seçki komissiyalarının yeni tərkibinin formalaşdırılması məsələsi də öz əksini tapıb.
