Azərbaycan, Bakı, 29 mart / Trend , müxbir C.Babayeva/Prezident seçkiləri ərəfəsində Azərbaycanın 12 gənclər təşkilatı prezidentliyə namizədlərdən biri ətrafında birləşir. Bu barədə şənbə günü Trend a yeni mərkəzin təşəbbüskarı, Azərbaycan Demokratik Gənclər Hərəkatının sədri Ağasif Şakiroğlu məlumat verib.
Azərbaycanda prezident seçkisi payızda keçiriləcək. Müxalifət düşərgəsindən Müsavat Partiyasının sədri İsa Qəmbər və Azərbaycan Demokrat Partiyasının sədri Sərdar Cəlaloğlu prezidentliyə namizədliklərini irəli sürüblər. Hakim Yeni Azərbaycan Partiyası hazırkı prezident İlham Əliyevin ikinci müddətə namizədliyini irəli sürəcəyini bəyan edib.
Şakiroğlunun sözlərinə görə, hazırda yeni mərkəzin yaradılması ilə bağlı müzakirələrdə "Dirəniş" Gənclər Birliyi,"Azad Azərbaycan" Gənclər Birliyi, "Qurtuluş" Gənclər Hərəkatı, "İslamçı" Gənclər Birliyi, "Difai" Gənclər Hərəkatı, Azərbaycan Demokratik Gənclər Hərəkatı, "Dirçəliş" Gənclər Hərəkatı, "Demokratik Azərbaycan" Hərəkatı, "Çırağ" Gənclər Mərkəzi, "Millətçi" Gənclər Klubu, "Nur" Gənclər Hərəkatı və "Demokratiya Uğrunda Gənclər" Birliyi iştirak edir.
"Azərbaycan gənclərinin yeni mərkəzinin yaradılması barədə saziş imzalanandan sonra mərkəzin sədrinin seçiləcəyi təsis qurultayı keçiriləcək" - deyə Şakiroğlu qeyd edib.
Yeni mərkəzin prezidentliyə hansı layiqli namizədi dəstəkləyəcəyinə gəlincə, Şakiroğlu bildirib ki, Mərkəz ənənəvi müxalifətdən olan namizədi dəstəkləməyəcək.
Azərbaycan Demokratik Gənclər Hərəkatı 2006-cı ilin yanvarında yaradılıb.
