Azərbaycan, Bakı, 31 mart / Trend müxbir C.Babayeva/ Gürcüstan azərbaycanlılarının "Qeyrət" Xalq Hərəkatı Parlament seçkilərinə namizədlərini hakim - "Vahid Milli Hərəkat" partiyasının siyahısında irəli sürəcək. Bu barədə bazar ertəsi Trend -a hərəkatın rəhbəri Əlibala Əsgərov məlumat verib.
Gürcüstanda parlament seçkiləri mayın 21-də keçiriləcək. Parlament seçkilərində 62 siyasi partiya iştirak edəcək.
Gürcüstan parlamentinin rəhbəri hakim - "Vahid Milli Hərəkat" partiyasının seçki siyahısına başçılıq edəcək. Partiyanın yekun seçki siyahısı hələ hazır deyil. Məlumatlara əsasən, siyahıya Gürcüstanın çox məşhur şəxsləri - alimlər, biznesmenlər və incəsənət xadimləri daxil ola bilər.
Əsgərovun sözlərinə görə, hazırda "Qeyrət" Xalq Hərəkatı daxilində iki azərbaycanlının namizədliyinin irəli sürülməsi ilə bağlı müzakirələr aparılır. Əsgərovun özü seçkilərdə iştirak etmək niyyətində deyil.
"Hazırki hakimiyyətlə Gürcüstanda yaşayan azərbaycanlıların problemlərnin həll olunmasına heç bir ümid yoxdur", deyə Əsgərov bildirib.
Gürcüstan azərbaycanlıları bəyan edir ki, onillərlə yaşadıqları ölkədə onların hüquqları pozulur. Onların gürcülərlə bərabər hüquqları yoxdur. İdarəetmə orqanlarında etnik azərbaycanlılar təmsil olunmur.
Azərbaycanlıların Gürcüstanın ictimai-siyasi həyatına inteqrasiyasını məhdudlaşdıran problemlərdən biri də gürcü dilini bilməməkdir.
Gürcüstanda, əsasən də Kvemo-Kartli regionunda təxminən 500 min azərbaycanlı yaşayır.
Məqalə müəllifi ilə trend ünvanı ilə əlaqə saxlamaq olar.