Azərbaycan, Bakı, 22 aprel/ Trend , müxbir S.Ağayeva/ Azərbaycan və Moldova hökumətləri hüquq-müqavilə bazasını daha dörd sənədlə genişləndirməyi planlaşdırırlar. Bu barədə çərşənbə axşamı Moldovanın Azərbaycandakı səfiri İon Robu Trend -a məlumat verib.
Azərbaycan və Moldova arasında yanacaq-energetika kompleksi sahəsində əməkdaşlıq, iqtisadi və vergi qanunvericiliyi hüquq pozuntuları ilə mübarizə sahəsində əməkdaşlıq və informasiya mübadiləsi, sənaye mülkiyyətinin mühafizəsi sahəsində əməkdaşlıq haqqında sazişlər, Moldova hökuməti ilə Azərbaycan Dövlət Neft Şirkəti (ARDNŞ) arasında əməkdaşlıq haqqında memorandum hökumətlərarası komissiya tərəfindən imzalanmaya hazırdır.
Sənədlər çərşənbə günü Bakıda, Moldova prezidenti Vladimir Voroninin Azərbaycana rəsmi səfəri zamanı (23-24 aprel) imzalanacaq.
Moldova prezidentinin birinci səfər gününün proqramına azərbaycanlı həmkarı İlham Əliyevlə təkbətək görüş, geniş tərkibdə danışıqlar və Azərbaycanda Moldova mədəniyyət günlərinin təntənəli açılış mərasimində iştirak daxildir. Növbəti gün Moldova prezidenti parlament sədri, Baş nazir və ARDNŞ prezidenti ilə görüşəcək.