Gürcüstan, Tbilisi, 23 may/ Trend , müxbir E.Rüstəmov/ Mayın 26-da Tbilisidə mitinqə kifayət qədər insan toplaşarsa, Gürcüstan müxalifəti ölkədə keçirilən parlament seçkilərinin nəticələrini etibarsız tanımaq niyyətindədir. "Kifayət qədər insan toplaşarsa, biz onların gürcü xalqının iradəsini ifadə etdiklərini söyləyə biləcək və hakimiyyətdən bu seçkiləri etibarsız olduğunu tanımaq və yeni seçkilərin təyin edilməsini tələb etməyə tam hüququmuz olduğunu düşünəcəyik", - "Birləşmiş Müxalifət"in liderlərindən biri Manana Naçkebiya hesab edir.
Mayın 21-də keçirilən seçkilərin ilkin nəticələrinə görə, Gürcüstanın hakim "Vahid Milli Hərəkat" partiyası yeni çağırış ölkə parlamentində 150 yerdən 120-ni alıb. "Proporsional sistem üzrə hakim partiya 49, Birləşmiş müxalifət isə 14 yer alır. Xristian-Demokratik Hərəkat və Leyborist partiyası isə hər biri 6 mandat alır", - Gürcüstan MSK-nın mətbuat katibi Zurab Kaçkaçişvili jurnalistlərə bildirib.
"Biz beş faizlik baryeri ötən və parlamentə daxil olan müxalifətlə razılığa gəlmişik ki, onlar parlamentdə qalmayacaqlar. Biz gedəcək və Mixal Saakaşvilinin "Milli Hərəkat"ını təklikdə qoyacağıq", - "Yeni Sağçılar" partiyasından parlament üzvü Naçkebiya cümə günü Trend -a bildirib.
Naçkebiyanın sözlərinə görə, bu, xarici ölkələrin diqqətini özünə cəlb edəcək etiraz olacaq və onlar anlayacaqlar ki, Gürcüstan demokratik dövlət deyil. "Biz artıq leyboristlərin razılığını almışıq və Gürcüstanın Xristina-Demokratik Hərəkatından cavab gözləyirik", - o bildirib.
"Əgər insanlar aksiyaya gəlməzlərsə, biz Gürcüstanın azad edilməsi və demokratik yola geri qayıtması üçün əlimizdən gələni etdiyimizi söyləyəcəyik", - Naçkebiya bildirib.