Azərbaycan, Bakı, 12 avqust/ Trend , müxbir C.Babayeva/ Gürcüstan Azərbaycanlıları Konqresi (GAK) bu ölkədə yaşayan və Cənubi Osetiyada hərbi əməliyyatlar zamanı zərər çəkmiş azərbaycanlılara yardım göstərmək xahişi ilə müsəlman ölkələrinə müraciət edəcək,- GAK-ın sədri Əli Babayev çərşənbə axşamı Tbilisidən telefonla Trend -a bildirib.
Avqustun 8 -də gecə tanınmamış Cənubi Osetiya respublikasında irimiqyaslı hərbi əməliyyatlar başlayıb. Gürcü ordusuTsxinvaliyə daxil olub. Sonradan Rusiya qoşunları Tsxinvalini tutub və gürcü hərbçiləri Gürcüstan ərazisinə sıxışdırıblar.
Gürcüstan XİN-in məlumatına əsasən, Rusiya qoşunları çərşənbə axşamı Zuqdidi və Poti şəhərlərini tutublar.
Rusiya KİV-in məlumatına əsasən, rusiyalı sülhməramlılar arasında həlak olan və yaralananlar var. Gürcüstan tərəfi 20 hərbi qulluqçunun həlak olduğunu bildirir. Rusiya XİN rəhbəri Sergey Lavrov bəyan edib ki, Cənubi Osetiyanın dinc sakinləri arasında həlak olan və yaralananların sayı minlərlədir.
Gürcüstanın azərbaycanlıların sıx yaşadığı Marneuli və Bolnisi şəhərləri Rusiya HHQ-nin intensiv atəşinə məruz qalıb. Marneuli hava limanının atəşə tutulması nəticəsində ən azı dörd nəfər həlak olub.
Bazar ertəsi Gürcüstan prezidenti Gürcüstan -Rusiya münaqişəsinin dinc nizamlama planını imzalayıb. Çərşənbə axşamı RF prezidenti Dmitri Medvedyev bildirib ki, Gürcüstanı sülhə məcbur etmək əməliyyatının başa çatması barədə qərar qəbul edib.
Babayevin sözlərinə görə, regionun döyüşlərin getdiyi, azərbaycanlıların yaşadıqları kənd və qəsəbələri boşaldılıb. "GAK nümayəndələri dağıdılmış yerlərə baş çəkiblər. Əksər Gürcüstan azərbaycanlıları evlərini tərk ediblər və əksəriyyətin harada olduğu hələ məlum deyil", - Babayev bildirib.
Onun sözlərinə görə, Qorinin şəhərətrafında yaşayan sakinləri müvəqqəti olaraq azərbaycanlıların sıx yaşadığı Borçalıya yerləşdirilib.
Gürcüstan Azərbaycanlıları Konqresi cari ilin martında təsis edilib. Konqresin həmtəsisçiləri Gürcüstanda fəaliyyət göstərən 20-dək Azərbaycan QHT-dir. Konqresin məqsədi azərbaycanlıların Gürcüstan cəmiyyətinə inteqrasiyasına yardım və onların problemlərinin həlli yollarının axtarılmasıdır.
Müəlliflə əlaqə saxlamaq üçün elektron ünvan - [email protected]
