Azərbaycan, Bakı, 03 oktyabr / Trend , müxbir A.Hüseynbala/ Rəşid Behbudov adına Mahnı Teatrının və Dənizçilərin Mədəniyyət Evinin rəhbərliyi Müxalifətin Əməkdaşlıq Mərkəzinin oktyabrın 4-də nəzərdə tutulan forumunun keçirilməsinə razılıq verməyib.
Bu məlumatı Trend-News-a Müxalifətin Əməkdaşılq Mərkəzinə daxil olan Müsavat Partiyası Mərkəzi İcra Aparatının rəhbəri Arif Hacılı verib.
Trend-News-in arayışı: Müxalifətin Əməkdaşlıq Mərkəzi forum keçirmək üçün sentyabrın 22-də Rəşid Behbudov adına Mahnı Teatrının, Dənizçilərin Mədəniyyət Evinin rəhbərliyinə, eyni zamanda Bakı Şəhər İcra Hakimiyyətinə müraciət edib. Meriyanın ictimai-siyasi şöbəsinin rəhbəri Zaur Ramazanov oktyabrın 2-də İcra Hakimiyyətinin forumun keçirilməsinə heç bir etirazı olmadığını bildirib, lakin seçkini boykot edən müxalifət təşkilatlarının tədbirlərini keçirmək üçün hər iki müəssisənin rəhbərliyi ilə razılığa gəlməsini məsləhət görüb.
Müsavatın Mərkəzi İcra Aparatının rəhbəri bu gün Müxalifətin Əməkdaşlıq Mərkəzinin nümayəndələrinin oktyabrın 3-də Rəşid Behbudov adına Mahnı Teatrının və Dənizçilərin Mədəniyyət Evinin rəhbərliyi ilə görüşdüyünü bildirib.
"Həm Mahnı Teatrının, həm də Dənizçilərin Mədəniyyət Evinin rəhbərliyi həmin yerlərdə əvvəlcədən planlaşdırılan tədbirlərin keçiriləcəyini əsas gətirərək nə sabah, nə də prezident seçkiləri başa çatanadək bizim forum keçirməyimizə texniki imkanları olmadığını bildiriblər", - Hacılı bildirib.
Hacılı bu səbəbdən oktyabrın 4-nə nəzərdə tutulan forumun təxirə salındığı barədə məlumat verib.
"Amma yəqin ki, Müxalifətin Əməkdaşlıq Mərkəzinə daxil olan təşkilatların liderlərinin birgə müzakirəsindən sonra forumun ya Müsavat Partiyasının qərargahında, ya başqa yerdə keçirilməsi ilə bağlı müvafiq qərar qəbul ediləcək", - Hacılı belə deyib.
Məqalə müəllifi ilə əlaqə ünvanı: [email protected]