Azərbayan, Bakı, 30 oktyabr/ Trend , müxbir İ.Əlizadə / Azərbaycanda prezidentliyə keçmiş namizədlər maliyyə hesabatlarını hazırlayıblar və yaxın günlərdə Mərkəzi Seçki Komissiyasına (MSK) təqdim edəcəklər. "Maliyyə hesabatımız hazırdır və gələn həftənin əvvəlində MSK-ya təqdim edəcəyik", - bu barədə cümə axşamı Trend - a müxalifəti təmsil edn Ümid Partiyasının sədri, prezdentliyə keçmiş namizəd İqbal Ağazadə bildirib.
Trend -un arayışı: Oktyabrın 15 - də Azərbaycanda prezident seçkisi keçirilib. Prezident seçkisində yeddi namizəd - Yeni Azərbaycan Partiyasının (YAP) sədri, indiki dövlət başçısı İlham Əliyev, müxalif Ümid Pariyasının sədri İqbal Ağazadə, Böyük Quruluş Partiyasının sədri Fazil Qəzənfəroğlu , Bütöv Azərbaycan Xalq Cəbhəsi Partiyasının sədri Qüdrət Həsənquliyev, Müasir Müsavat Partiyasının sədri Hafiz Hacıyev, Azərbaycan Liberal Demokrat Partiyasının sədri Fuad Əliyev və müstəqil namizəd Qulamhüseyn Əlibəyli iştirak edib.
Seçkinin nəticələrinə əsasən, İlham Əliyev hamıdan çox səs toplayıb - 88.73 faiz.
İqbal Ağazadə 2, 86 faiz, Fazil Qəzənfəroğlu 2,4 faiz, Qüdrət Həsənquliyev 2,28 faiz, Qulamhüseyn Əlibəyli 2,23 faiz, Fuad Əliyev 0,78 faiz, Hafiz Hacıyev 0,65 faiz səs toplayıb.
Seçki Məcəlləsinə əsasən, prezidentliyə keçmiş namizədlər rəsmi nəticələr açıqlandıqdan sonra on gün müddətində maliyyə hesabatını MSK-ya təqdim etməlidirlər.
Ağazadə qeyd edib ki, seçki kampaniyasına 200 min manatdan artıq vəsait xərcləyib. Onun sözlərinə görə, üç faizdən az səs topladığına görə, Seçki Məcəlləsinin tələbinə əməl edərək, MSK-nın ayırdığı 28 min 800 manatı geri qaytaracaq.
Hakim Yeni Azərbaycan Partiyasından prezidentliyə keçmiş namizəd, dövlət başçısı İlham Əliyevin səlahiyyətli nümayəndəsi Siyavuş Novruzovun sözlərinə görə, bir neçə gün əvvəl maliyyə hesabatını MSK-ya təqdim ediblər.
"Seçki Məcəlləsinə əsasən, prezdentliyə namizədin seçki qərərgahı üç dəfə MSK-ya hesabat təqdim eməlidir. Hər üç hesabatı vaxtında MSK-ya təqdim etmişik", -deyə o, əlavə edib.
Novruzov hakim partiyanın seçki kampaniyasına nə qədər vəsait xərclədiyini açıqlamayıb: "Seçki Məcəlləsi bu məlumatın açıqlanmasına imkan vermir. Bütün məlumatları MSK-ya vermişik".
Müxalifəti təmsil edən Azərbaycan Liberal Demokrat Partiyasının sədri, prezidentliyə keçmiş namizəd Fuad Əliyev bildirib ki, maliyyə hesabatı hazırdır və gələn həftənin bazar ertəsi MSK-ya təqdim edəcək.
"Seçki kampaniyasına 60 min manatdan artıq vəsait xərcləmişik. Üç faizdən az səs topladığıma görə, 28 min 800 manatı bir il ərzində MSK-ya qaytaracağam", - deyə o, əlavə edib.
Müxalifəti təmsil edən Böyük Quruluş Partiyasının sədri, prezidentliyə keçmiş namizəd Fazil Qəzənfəroğlu qeyd edib ki, maliyyə hesabatı hazırdır və iki gün müddətində MSK-ya təqdim edəcək: "Seçki kampaniyasına 35 min manatdan artıq vəsait xərcləmişik. Deputat maaşımdan ayırmaqla, bir il müddətində 28 min 800 manatı MSK-ya qaytaracam".
Müasir Müsavat Partiyasının sədri, müxalifətdən prezidentliyə keçmş namizəd Hafiz Hacıyev bildirib ki, MSK-ya maliyyə hesabatı təqdim etməycək: "Mən nə aldığım pulu geri qaytaracam, nə də maliyyə hesabatı verəcəyəm. Seçki kampaniyasına 250 min manata yaxın pul xərcləmişəm".
Öz təşəbbüsü ilə seçkiyə qatılan müstəqil namizəd Qulamhüseyn Əlibəyllinin seçki qərərgahının rəhbəri Qorxmaz İbrahimli bldirib ki, maliyyə hesabatını br necə günə MSK-ya təqdim edəcəklər.
"Biz seçki kampaniyasına 50 min manatdan artıq vəsait xərcləmişik. 28 min 800 matanı da bir il ərzində MSK-ya qaytaracağıq", -deyə İbrahimli bildirib.
Müxalifəti təmsil edən Bütöv Azərbaycan Xalq Cəbhəsi Partiyasının sədri, prezidentliyə keçmiş namizəd Qüdrət Həsənquliyev də yaxın günlərdə maliyyə hesabatını MSK-ya təqdim edəcək.
Məqalə müəllifi ilə əlaqə ünvanı: [email protected]
