Azərbaycan, Bakı, 18 avqust / Trend /
İlin birinci yarısında BP şirkəti ("Azəri-Çıraq-Günəşli" və "Şahdəniz" yataqlarının işlənməsi layihəsinin operatoru) Azərbaycandakı Sanqaçal terminalından sutkada orta hesabla 806 min bareldən çox neft və 19 milyon kubmetr (665,5 milyon kubfut) qaz ixrac edib. Bu barədə şirkətin məlumatında deyilir.
Sanqaçal terminalından neft dünya bazarına əsasən "Bakı-Tbilisi-Ceyhan" (BTC) neft kəməri ilə, qaz isə Cənubi Qafqaz boru kəməri (CQB) ilə çatdırılır. İxrac boru kəməri - qərb marşrutu ilə ("Bakı-Supsa") Qara dənizdəki Supsa terminalına ilin birinci yarısında sutkada orta hesabla 91 min barel neft nəql edilib.
Sanqaçal terminalında məhsulların qəbulu və emalı üzrə texnoloji qurğuların məhsuldarlığı hazırda sutkada 1,2 milyon barel neft və 39,5 milyon kubmetr qaz təşkil edir.
2009-cu ildə terminaldan sutkalıq ixracın ən yüksək göstəricisi bu il mayın 1-də qeydə alınıb. O zaman Sanqaçalda 1 001 270 barel neft emal olunub və ixrac edilib. Ümumi həcmdən 846 340 barel BTC ilə, 88 674 barel qərb boru kəməri ilə, qalan 66 256 barel isə dəmiryol ilə daşınıb.
