Ceymstaun Fondu: Azərbaycan dinlərarası münasibətlərin modeli kimi ABŞ üçün əhəmiyyətlidir (FOTO)
Azərbaycan, Bakı, 6 dekabr /Trend, müxbir K.Zərbalıyeva/
ABŞ-da "Azərbaycanda dinlərarası hörmət və dialoq" mövzusunda "dəyirmi masa" təşkil keçirilib.
ABŞ-ın Ceymstaun Fondunda keçirilən tədbir Dini Qurumlarla İş üzrə Dövlət Komitəsi, Azərbaycanın bu ölkədəki səfirliyi və Ceymstaun Fondunun təşkilatçılığı ilə keçirilib.
Dövlət Komitəsindən Trend-ə verilən məlumata görə, Dini Qurumlarla İş üzrə Dövlət Komitəsinin (DQİDK) sədri Elşad İskəndərovun ABŞ-a səfəri çərçivəsində keçirilən tədbirin əsas məqsədi Azərbaycanda din-dövlət münasibətləri, dini tolerantlıq və dinlərarası əməkdaşlıq və qarşılıqlı hörmət modelini ABŞ siyasi və akademik elitasına təqdim etmək olub.
Ceymstaun Fondunun nümayəndəsi, Qafqaz regionu üzrə ekspert Vladimir Sokor müzakirə mövzusunun əhəmiyyəti barədə danışıb. Azərbaycanın ABŞ-ın önəmli müttəfiqi olduğunu bildirən natiq, ölkəmizin təkcə enerji və təhlükəsizlik məsələlərində deyil, həmçinin "dinlərarası münasibətlərin modeli" kimi də ABŞ və ümümilikdə Qərb ölkələri üçün əhəmiyyətini vurğulayıb.
Komitənin sədri İskəndərov Azərbaycanda yəhudiliyin, xristianlığın və İslamın tarixi barədə tədbir iştirakçılarını məlumatlandırıb və bu kontekstdə Qafqaz Albaniyasının dini-mədəni irsi barədə ətraflı məlumat verib.
O, öz çıxışında Azərbaycanda qədim dövrlərdən başlayaraq müxtəlif millətlərin, dinlərin və mədəniyyətlərin nümayəndələrinin yaşadığını, onların unikal Azərbaycan mədəniyyətinin formalaşdırılmasına töfhə verdiyini bildirib. Azərbaycanda dinlərarası münasibətlərin qarşılıqlı hörmət və əməkdaşlıq müstəvisində inkişaf etdiyini bildirib.
Dövlər Komitəsinin sədri, həmçinin müasir dövrdə Azərbaycan dövlətinin tarixi ənənələri qoruyub saxlamaq istiqamətində gördüyü işlərə toxunub və bu sahədə mövcud təhdidlərin qarşısının uğurla alındığını qeyd edib.
Azərbaycandakı dinlərarası dialoq modelinin dünya üçün önəm daşıdığını vurğulayan İskəndərov bu sahədə bir çox beynəlxalq mütəxəssislərin "Azərbaycan modeli"nin beynəlxalq səviyyədə tərənnüm edilməsi məqsədini daşıyacaq "Dinlərarası dialoq və tolerantlıq mərkəzi"nin yaradılmasını təklif etdiyini qeyd edib.
