Azərbaycan, Bakı, 9 oktyabr /Trend, müxbir Rufiz Hafizoğlu/
"İslam Dövləti" terror təşkilatı Türkiyə üçün təhlükə törədir. Trend-in "TRT Haber" telekanalına istinadən verdiyi məlumata görə, bunu Türkiyənin xarici işlər naziri Mövlud Çavuşoğlu NATO-nun baş katibi Yens Stoltenberqlə görüşdə deyib.
Onun sözlərinə görə, Türkiyə Suriya və İraqdan gələn terror təhlükəsi barədə dünya ictimaiyyətini həmişə xəbərdar edib.
M.Çavuşoğlu qeyd edib ki, Bəşşar Əsəd hökuməti Suriyanın bütün problemlərinin səbəbkarıdır: "Əsəd rejimi Suriyada radikal və terror qruplaşmalarının yaradılmasına təkan verib və heç kəs bilmir ki, gələcəkdə regionda daha hansı terror qruplaşmaları yarana bilər".
Nazir əlavə edib ki, "İslam Dövləti" ilə mübarizə üçün "Azad Suriya Ordusu"na dəstək vermək lazımdır: "Ankara Suriya üzərində uçuşsuz zonanın yaradılmasında təkid edir".