Bakı. Trend:
Son günlər ABŞ-nin Azərbaycanla bağlı qərəzli mövqeyi özünü daha açıq büruzə verir.
Trend-in məlumatına görə, bunu deputat Tural Gəncəliyev Milli Məclisin bu gün keçirilən iclasında deyib.
O qeyd edib ki, 907-ci düzəlişin yenidən gündəmə gətirilməsi ABŞ-nin növbəti belə addımıdır:
“1992-ci ildə bu sənədin qəbulundan sonra 2001-ci ildə terrora məruz qalanda ABŞ öz səhvini anlamışdı və 907-ci düzəlişin qüvvəsini dayandırmışdı. Yenidən belə olacağına inanıram. ABŞ Senatı, o cümlədən, ABŞ dövlət katibinin rəsmisi Azərbaycana qarşı absurd fikirlər səsləndirir.
Bütün bunlar ABŞ-nin ölkəmizlə bağlı iç üzünü göstərir. Biz indi başa düşürük ki, 30 il ərzində ATƏT həmsədri olan ABŞ bizim torpaqlarımızın işğal altında qalmasında maraqlı olub”, - deyə o əlavə edib.