Sentyabrın 1-də Yeni Müsavat, Azərbaycan Demokrat və bir neçə başqa partiya, gənclər təşkilatının üzvləri Beynəlxalq Mətbuat Mərkəzində (BMM) mətbuat konfransı keçiriblər. Trend məlumat verir ki, təbdirin keçirilməsində məqsəd avqustun 25-dən 26-na keçən gecə həbs olunmuş gənclərin azadlığa buraxılması ilə bağlı jurnalistləri məlumatlandırmaq olub.
ADP Gənclər Təşkilatının sədri Nizami Həsənov jurnalistlərin nəzərinə çatdırıb ki, avqustun 25-dən 26-na keçən gecə həbs olunmuş gənclər hələ də azadlığa buraxılmayıb. "Bilirsiniz ki, təxminən 100 nəfərə yaxın gənc həmin gecə şəhərin mərkəzi küçələrindəki divarlara seçkilərə çağırışlarla bağlı şüarlar yazılmış kağızlar yapışdırarkən həbs olunublar. "Çağrı", "Son", "Məqam" və "İrəli" gənclər təşkilatlarının üzvlərinin həmin gecə bu aksiyanı keçirməkdə məqsədləri əhalini parlament seçkilərində fəal iştiraka səsləmək olub. Yəni bu bir təbliğat vasitəsi idi və heç bir cinayət xarakteri daşımır. Ancaq polis işçiləri küçələrə tökülüşərək fiziki zor tətbiq etməklə həmin gəncləri polis bölmələrinə aparıb" - deyə N.Həsənov bildirib.
ADP gənclər təşkilatının sədrinin sözlərinə görə, Yasamal Rayon Polis İdarəsinin 18-ci və Səbail Rayon 9-cü bölməsinə aparılmış gənclərə işgəncələr verilib. Həmin polis bölmələrinin rəisləri və başqa polis işçiləri gənclərdən müsadirə etdikləri rənglərlə onların paltarlarını rəngləməklə təhqir ediblər. N.Həsənov: "Məhkəmə 9 nəfər gəncin 10 və 12 sutka olmaqla həbsi, 1 nəfərin isə 150.000 manat məbləğində cərimələnməsi barədə qərar çıxarıb. Həmin gənclər hazırda da həbsdə saxlanılırlar. Hesab edirik ki, məhkəmənin çıxardığı qərar ədalətsizdir və Azərbaycan gəncliyinə təzyiq vasitəsidir".
Tədbirdə iştirak edən gənclər təşkilatlarının üzvləri həbsdə saxlanılan həmyaşıdlarının dərhal azadlığa buraxılmaları və barələrindəki məhkəmə qərarırının ləğv edilməsi ilə bağlı bəyanat səsləndiriblər. Bəyanatda qeyd olunur ki, gənclərin bu aksiyanı keçirməkdə məqsədləri təxribat yox, əhalini seçkilərdə iştiraka səsləmək olub.
