Azərbaycan, Bakı / Trend müxbir S.İlhamqızı/ Azərbaycanda qarşıdan gələn prezident seçkilərində müxalifət düşərgəsinin üç və ya dörd əsas güc mərkəzi formalaşacaq. Bu barədə Azərbaycan Naminə İctimai Forumun prezidenti, Azərbaycan Prezidenti Katibliyinin keçmiş rəhbəri Eldar Namazov açıqlama verib.
Onun sözlərinə görə, seçkidə iddialıların sayının çox olması mümkündür: "Lakin iddialı olmaq hələ o demək deyil ki, seçkidə iştirak etmək və qalib gəlmək üçün real imkanların var. Mənim fikrimcə, bu ilin sonuna kimi yeni koalisiyalar, bloklar yaranacaq. Gələn ilin əvvəlində isə bu güc mərkəzləri arasında danışıqlar başlanacaq. Çox güman ki, ən geci aprel-may aylarına qədər qüvvələr arasında razılaşmalar da ola bilər"-deyə Namazov qeyd edib.
Namazov özü də həmin güc mərkəzlərindən birində təmsil olunacağını deyib: "Mən bu seçkidə müxalifəti təmsil edəcəyəm. Haqq-ədalətin bərpa olunmasına, demokratiyanın inkişafına çalışan, korrupsiyaya qarşı mübarizə aparan namizədə dəstək verəcəyəm".
Namazov əlavə edib ki, parlament seçkilərinə hesablanmış seçki bloku eyni formatda prezident seçkisində iştirak edə bilməz. Ona görə də 2005-ci ildə yaradılmış "Yeni Siyasət" blokunun eyni formatda prezident seçkilərində iştirakı mümkün olmayacaq.
