Azərbaycan, Bakı, 27 fevral / Trend ", müxbir E.Hüseynli/ Kürdəmir rayonunun Carlı, Köhünlü, Sovla, Şüşün, Beyi, Zərdab rayonunun Körpükənd, Əlvənd, Pərvanlı, Məlikumudlu, Şahhüseynli, Qoruq Bağı kəndlərində fevralın 27-də yeni quraşdırılmış 11 ədəd modul tipli su təmizləyici qurğu istifadəyə verilib. Bu barədə çərşənbə günü Trend -a nazirliyin mətbuat xidmətindən məlumat verilib.
Ölkəyə gətirilmiş modul tipli su təmizləyici qurğular İtaliya, ABŞ, Almaniya, Belçika istehsalı olan avadanlıqlardan ibarətdir və Türkiyədə modulda komplektləşdirilib. Qurğuların 40 ədədi gündə 20 m3, 10 ədədi gündə 30 m3 su təmizləmə gücünə malikdir.
Quraşdırılmış qurğuların fəaliyyəti nəticəsində, Kürdəmir rayonunun sözügedən kəndlərinin 5554 nəfər əhalisi 41 bulaq, Zərdab rayonunun 8293 nəfər əhalisi isə, 56 bulaq vasitəsilə təmiz içməli sudan istifadə edəcək.
Nazirlik keyfiyyətli su imkanları məhdud olan 100 kənddə modul tipli təmizləyici qurğuların quraşdırılması hesabına, 161,5 min kənd əhalisinə verilən su Ümumdünya Səhiyyə Təşkilatının normalarına uyğun təmizlənəcək. İlkin olaraq 8 rayonda (Yevlax, Zərdab, Kürdəmir, İmişli, Sabirabad, Saatlı, Salyan və Neftçala) 50 yaşayış məntəqəsinin keyfiyyətli su təminatı məhdud olan və içməli sudan əziyyət çəkən 55 mindən çox əhalisinin içməli su ilə təmin olunması üzrə görülən işlər yekunlaşıb.