Azərbaycan, Bakı, 10 mart/ Trend , müxbir E.Hüseynov/ KİV azadlığı üzrə ATƏT nümayəndəsi Mikloş Haraşti "Azadlıq" müxalifət qəzetinin baş redaktoruna qarşı dörd illik həbs cəzasının Azərbaycanda tənqidi səslərin boğulması üçün aparılan kampaniyanın bir hissəsi hesab edir.
"Qənimət Zahidin işi üzrə sərt hökm, ölkə hökumətini tənqid edən azsaylı qəzetlərdən birinin redaktorunu susmağa məcbur edilməyə yönəlib", - bazar ertəsi Haraştinin ATƏT-in rəsmi saytında dərc edilən bəyanatında deyilir.
Ötən cümə günü Bakı məhkəməsinin qərarı ilə Zahidov xuliqanlıq və insan sağlamlığına qəsdən zərər yetirmə ittihamları üzrə dörd il müddətinə azadlıqdan məhrum edilib. Buna ötən ilin noyabrında "Azadlıq" qəzetinin redaksiyasının yerləşdiyi "Azərbaycan" nəşriyyatı qarşısında baş verən insident səbəb olub. Baş redaktor dava zamanı Vüsal Həsənova kəllə-beyin travması yetirib.
"Zahidovu həbsxanaya salmaq üçün jurnalistikaya aid olmayan ittihamdan istifadə repressiyanın nümunəsidir. Belə ki, faktiki olaraq, jurnalistikanın kriminallaşması davam edir", - Haraşti bildirib. Onun sözlərinə görə, qeyri-hökumətyönlü jurnalistlərin onların peşəsilə bağlı olmayan ittihamlarla həbsxanaya salınmasına dair digər hallar, müxalifət KİV-ə təzyiq göstərilməsi üzrə kampaniyanın bir hissəsidir.
Hazırda Azərbaycanda üç jurnalist həbsxanadadır. Onlardan Qənimətin qardaşı Sakit Zahidov artıq üç illik, ikidilli müxalifət qəzeti "Gündəlik Azərbaycan"-ın baş redaktoru Eynulla Fətullayev isə, 12 illik həbs cəzası çəkir.