Azərbaycan,Bakı,20 may / Trend , müxbir K. Zərbalıyeva/ "Azadlıq" qəzetinin bıçaqlanan müxbiri Dövlət Sərhəd xidmətini, Baş Prokurorluğu və Baş Prokurorluğun Ağır Cinayətlərə dair İstintaq İdarəsini məhkəməyə verib.
Aqil Xəlilin vəkili Elçin Sadıqov bildirib ki, jurnalist ölkədən çıxmağa icazə verilməməsinin qanunsuz hesab edilməsi, ölkədən daimi maneəsiz çıxmağa icazə verilməsi və pozulmuş hüquqlarına görə kompensasiya ödənilməsi tələbi ilə Nəsimi rayon məhkəməsinə iddia verilib.Vəkil deyib ki, həmin qurumlar bu il mayın əvvəllərində qanunsuz olaraq jurnalistin ölkədən çıxmasına icazə verməyib.Vəkil Aqil Xəlilin bıçaqlanması ilə bağlı cinayət işi üzrə həbs edilmiş Sergey Strekalinin cinayət işinin istintaqının başa çatdığını deyib. Strekalinə Cinayət Məcəlləsinin qəsdən sağlamlığa az ağır zərər vurma, qanunsuz olaraq narkotik vasitələri saxlama və satma maddələri ilə yanaşı, rəsmi sənədləri saxtalaşdırma (320.1) maddəsi ilə yeni ittiham da irəli sürürlüb.Xəlil fevralın 22-də "Zeytunlar bağı" ərazisində döyülüb. Martda isə, işdən evə qayıdarkən bıçaqlanıb.Prokurorluğun yaydığı rəsmi məlumatda Xəlilin homoseksual tərəfindən bıçaqlandığı bildirilib.
Müəlliflə əlaqə saxlamaq üçün elektron ünvan - [email protected]