Azərbaycan, Bakı, 22 oktyabr / Trend , müxbir K.Zərbalıyeva/ Ötən il Bakıda 25 nəfərin ölümü ilə nəticələnmiş bina uçqununda təqsirli bilinənlərin barələrindəki hökmdən verilən apellyasiya şikayətinə baxılıb.
Bakı Apellyasiya Məhkəməsindən çərşənbə günü verilən məlumata görə, prosesdə dövlət ittihamçısı çıxış edərək apellyasiya şikayətinin təmin olunmamasını və hökmün qüvvədə saxlanılmasını xahiş edib.
Məhkəmə oktyabrın 27-də bu işlə bağlı qərar elan edəcək.
Ötən il avqustun 28-də Yasamal rayonu, Murtuza Muxtarov küçəsi, 185 saylı ünvanda "Mütəfəkkir" Məhdud Məsuliyyətli Cəmiyyəti tərəfindən inşa edilən on beş mərtəbəli yaşayış binası tamamilə uçub. Nəticədə 25 nəfər həlak olub, 6 nəfər xəsarət alıb.
"Mütəfəkkir" MMC-nin baş direktoru, mühəndis Əsgər Əliyev 9, iş icraçıları Fərhad Həsənov 7, Qədir Səlimov 5 il 6 ay, Mürsəl Haqverdiyev 5, Eldar Rəhimov 4 il 6 ay müddətinə azadlıqdan məhrum ediliblər.
Bakı Şəhər İcra Hakimiyyətinin Mənzil Tikinti İdarəsinin sabiq rəisi Akif Məhərrəmovun həbsdə saxlandığı 8 ay müddət cəzaya hesablanmaqla məhkəmə zalından azad olunub.
Faktla bağlı Bakı şəhər Prokurorluğunda Cinayət Məcəlləsinin ehtiyatsızlıqdan zərərçəkmiş şəxsin ölümünə və digər ağır nəticələrə səbəb olan tikinti işlərinin aparılmasının təhlükəsizlik qaydalarını pozma, qanunvericiliklə müəyyən olunmuş qaydada müvafiq icra hakimiyyəti orqanlarının razılığını almadan özbaşına bina tikmə (222.2 və 222-1.2) maddələri ilə cinayət işi başlanıb.
"Mütəfəkkir" MMC-nin rəhbəri Əli Muradov ötən il ürək xəstəliyindən istintaq təcridxanasında dünyasını dəyişdiyindən cinayət işinin ona aid hissəsinə xitam verilib.
Müəlliflə əlaqə saxlamaq üçün elektron ünvan- [email protected]