Azərbaycan, Bакı, 04 may / Trend , müxbir A.Hüseynbala /
Gürcüstanda yaşayan soydaşlarımızın vəziyyəti bu ölkənin hakimiyyət nümayəndələri ilə görüşdə müzakirə edilib.
"Tədbirdə Gürcüstanın Xarici İşlər və Kənd Təsərrüfatı nazirliklərinin, Azərbaycanın bu ölkədəki səfirliyinin nümayəndələri, yerli icra strukturları və hüquq-mühafizə orqanlarının rəhbərləri iştirak edirdilər", - bazar ertəsi Trend -a Gürcüstan Azərbaycanlılarının "Borçalı" Cəmiyyətini yeni sədri, Klassik Xalq Cəbhəsi Partiyası (KXCP) Ali Məclisinin sədri Zəlimxan Məmmədli bildirib.
Trend -un arayışı: Gürcüstan Azərbaycanlılarının "Borçalı" Cəçiyyəti Azərbaycanın Ədliyyə Nazirliyində 1992-ci ildə dövlət qeydiyyatına alınıb. Qeyri-rəsmi rəsmi məlumatlara görə, Gürcüstanda 500 mindən çox azərbaycanlı yaşayır.
Məmmədli cəmiyyətin aprel ayında keçirilən növbəti qurultayında sədr seçilib.
Məmmədlinin sözlərinə görə, cəmiyyətin yeni rəhbəri kimi əsas niyyəti Gürcüstanda yaşayan soydaşlarımızın problemlərinin iki dövlət səviyyəsində həllinə nail olmaqdır.
"Azərbaycanda bəzən iddia edirlər ki, Borçalıda qısa müddətdə heç kim qalmayacaq, orada çox ciddi qarşıdurma var. Bizim əsas vəzifəmiz Azərbaycan ictimaiyyətini qonşu ölkədə baş verən proseslər haqda obyektiv məlumatlandırmaqdır", - cəmiyyət sədri əlavə edib.
Onun fikrincə, Azərbaycanın Cənubi Qafqazda müttəfiq olduğu Gürcüstan dövləti ilə münasibətlərinə xələl gətirən hər hansı addım atılmamalıdır.
"Gürcüstanın hakimiyyət nümayəndələri ilə görüşümüzdə də cəmiyyətin çox böyük bir missiyanı üzərinə götürdüyünü qeyd etdik. Biz bütün məsələlərin dialoq vasitəsilə həllinə üstünlük verəcəyimizi bildirdik", - Məmmədli vurğulayıb.
Məmmədli deyib ki, soydaşlarımızın separatizm çağırışlarını heç vaxt dəstəkləməyəcəklərinə gürcü cəmiyyətini inandırmaq üçün də çox iş görülməlidir.
"Bunun üçün soydaşlarımız gürcü cəmiyyətinə inteqrasiya etməlidirlər. Soydaşlarımızı inandırmağa ehtiyac var ki, Gürcüstanda etnik ayrıseçkilik yoxdur, bəzi nöqsanlar var və bunlar aradan qaldırılmalıdır", - cəmiyyət sədri bildirib.
Onun sözlərinə görə, Gürcüstanda yaşayan azərbaycanlıların problemlərinin həlli üçün sosial yönümlü layihələrin həyata keçirilməsi də zəruridir. "Biz bütün bu məsələlərin həllinə nail olmaq üçün Azərbaycanın Diasporla İş üzrə Dövlət Komitəsi ilə də sıx əməkdaşlıq edəcəyik", - Məmmədli vəd verib.
Məqalə müəllifi ilə əlaqə ünvanı:[email protected]
