Azərbaycan, Bakı, 6 noyabr / Trend , muxbir H.Bağırov/
Azərbaycanın Şəmkir rayonunda ibtidai sinif müəlliminin qətlində günahlandırılan şəxsin məhkəməsi başlayıb.
Trend -un məlumatına görə, cümə günü Ağır Cinayətlərə Dair İşlər üzrə Məhkəmədə Şəmkir rayonunun Düyərli kənd sakini Elbrus Bayramov elan olunmuş ittiham üzrə özünü təqsirli bilməyib. O bildirib ki, Tamella İsgəndərova ilə yaxın münsibəti olsa da, onu öldürmək niyyəti olmayıb.
Bu il iyulun 10-da Şəmkir rayonunun Düyərli kəndində, kənd sakini İsgəndərovaya məxsus 1 mərtəbəli 3 otaqlı evdə yanğın baş verib. Nəticədə bütövlükdə evin yanar konstruksiyaları və oradakı əşyalar yanıb, yanğın söndürüldükdən sonra İsgəndərovanın tüstüdən boğulmuş meyiti tapılıb.
İyulunu 18-də Daxili İşlər Nazirliyinin Baş Cinayət-Axtarış İdarəsi, Şəmkir rayon Polis Şöbəsi və Şəmkir rayon prokurorluğu əməkdaşlarının birgə keçirdikləri əməliyyat-axtarış tədbirləri nəticəsində İsgəndərovanı Bayramovun öldürməsi müəyyən edilib və o həbs edilib.
Təqsirləndirilən şəxs Cinayət Məcəlləsinin qəsdən adamöldürmə (120.2.4, 120.2.5, 120.2.6) maddələri ilə təqsirli bilinir.
Məhkəmə prosesi davam edir.
Məqalə müəllifi ilə əlaqə ünvanı: [email protected]
