Azərbaycan, Bakı, 11 yanvar / Trend , müxbir K.Zərbalıyeva/
Azərbaycanın Sumqayıt şəhərində yanvar ayında bir neçə sosial obyekt istifadəyə veriləcək.
Sumqayıt şəhər İcra Hakimiyyətindən Trend -a verilən məlumata görə, Uşaq və Yeniyetmələrin Yaradıcılıq Mərkəzi və 3 saylı Uşaq-Gənclər İdman Şahmat-Dama Məktəbində aparılan müasir üslubda əsaslı təmir və yenidənqurma işləri başa çatıb. Yaxın gələcəkdə hər iki sosial obyekt istifadəyə veriləcək.
1958-ci ildə yaradılan Uşaq və Yeniyetmələrin Yaradıcılıq Mərkəzində hazırda 21 dərnək fəaliyyət göstərir. Ümumilikdə, 1415 məktəblinin cəlb edildiyi bu dərnəklərə misal olaraq bədii qiraət, təsviri incəsənət, dekorativ tətbiqi sənət, dərzilik, bərbərlik, uşaq xoru, rəqs, xalçaçılıq, teatr, həyat bilgisi, xalq çalğı alətləri ansamblı, instrumental ansambl, poliqlot, uşaq hüquqları, musiqisevərlər, muğam və əyləncəli riyaziyyatı misal göstərmək olar. Mərkəzdə akt, sərgi və rəqs zalları, kitabxana, iki qrim, 15 dərnək otağı, 1 xor studiyası və 8 sanuzel mövcuddur.
1981-ci ildə yaradılan Şəhər Şahmat Məktəbində isə hazırda 41 qrup fəaliyyət göstərir. Bu qruplarda 21 məşqçinin rəhbərliyi altında 508 nəfər uşaq, yeniyetmə, gənc şahmat və dama ilə məşğul olur. Məktəb ötən il Azərbaycan Respublikası Təhsil Nazirliyinin elan etdiyi "Respublikada ilin ən yaxşı şahmat məktəbi" üzrə şəhərlərarası müsabiqədə birinci yerə layiq görülüb.