Azərbaycan, Bakı, 29 mart / Trend , müxbir H.Bağırov/
Azərbaycanda narkotik vasitələrin qanunsuz dövriyyəsində ittiham olunan sabiq prokuror oğlunun apelyasiya şikayəti təmin edilməyib.
Trend -un məlumatına görə, bu gün Bakı Apelyasiya Məhkəməsində Əzizbəyov rayonunun sabiq prokuroru Rəşid Həsənovun oğlu Yalçın Həsənovun Ağır Cinayətlərə Dair İşlər üzrə Məhkəmənin hökmündən verdiyi apelyasiya şikayəti üzrə qərar elan edilib.
Qərara görə, Həsənovun apelyasiya şikayəti təmin edilməyib və Ağır Cinayətlərə Dair İşlər üzrə Məhkəmənin hökmü qüvvədə saxlanılıb.
Xalq artisti İlhamə Quliyevanın oğlu Orxan Nadirov, Bakı şəhərinin sabiq prokuroru Ədalət Mirsalamlının oğlu Mahir Mirsalamlı, Əzizbəyov rayonunun sabiq prokuroru Rəşid Həsənovun oğlu Yalçın Həsənov, Elşən Rüstəmov, Əli İsmayılov, Zubiyə Qulami, Vüqar Əliyev, Ramin Həsənov, Kamilə Eyvazova, Elşən Budaqov, Həsən Həsənov, Mirəli Əliyev, Ruslan Rüstəmov və Ruslan Zalıyev Cinayət Məcəlləsinin 206-cı (qaçaqmalçılıq), 234.1-ci (satış məqsədi olmadan qanunsuz olaraq narkotik vasitələri və ya psixotrop maddələri şəxsi istehlak miqdarından artıq miqdarda əldə etmə və ya saxlama) və 234.4.1-ci (qabaqcadan əlbir olan bir qrup şəxs tərəfindən və ya mütəşəkkil dəstə tərəfindən qanunsuz olaraq narkotik vasitələri, psixotrop maddələri və ya onların prekursorlarını hazırlama, istehsal etmə, əldə etmə, saxlama, daşıma, göndərmə və ya satma) maddələri ilə ittiham olunublar.
Təqsirləndirilən şəxslər ötən ilin mayında Milli Təhlükəsizlik Nazirliyinin keçirdiyi əməliyyat tədbirləri nəticəsində həbs ediliblər. Onlardan narkotik vasitə olan "ekstazi" aşkarlanıb.
Ağır Cinayətlərə Dair İşlər üzrə Məhkəmənin hökmü ilə Yalçın Həsənova 8 il, Həsən Həsənova 7 il 3 ay, Ruslan Rüstəmova 7 il 3 ay, Ruslan Zalıyevə 2 il, Vüqar Əliyevə 2 il, Cavid Əliyevə 2 il, Zubayə Qulamiyə 6 il, Əli İsmayılova 7 il 6 ay müddətinə azadlıqdan məhrumetmə cəzası verilib.
Orxan Nadirova 11 ay, Kamilə Eyvazovaya 10 ay, Ramin Həsənova 10 ay, Elşən Budaqova 9 ay və Mirəli Əliyevə 9 ay cəza verilib və onların həbsdə olduqları müddət cəza müddətinə hesablanaraq məhkəmə zalından azad olunublar.
Xalq artisti İlhamə Quliyevanın oğlu Orxan Nadirovun əməli Cinayət Məcəlləsinin cinayət barəsində xəbər verməmə və ya qabaqcadan vəd etmədən cinayəti gizlətmə (307) maddəsi ilə tövsif olunub.
Bakı Şəhər prokurorluğunun sabiq rəhbəri Ədalət Mirsalamlının oğlu Mahir Mirsalamlının ağır xəstə olmasını əsas gətirərək, məhkəmə onun barəsindəki cinayət işini ümumi işdən ayırmaq və cinayət işinin icraatını dayandırmaq barədə qərar qəbul edib.
Təqsirləndirilən şəxslərdən Həsən Həsənov, Rüstəm Rüstəmov, Əli İsmayılov və Zubayə Qulaminin apelyasiya şikayətinə bir müddət əvvəl Bakı Apelyasiya Məhkəməsində baxılıb və məhkəmənin onların barədə çıxardığı hökm qüvvədə saxlanılıb.