Azərbaycan, Bakı, 2 may /Trend, müxbir T.Hacıyev/
Beynəlxalq Şahmat Federasiyası (FİDE) yeni reytinq cədvəlini açıqlayıb. Trend-in FİDE-nin rəsmi saytına istinadən verdiyi məlumata görə, Azərbaycanın iki şahmatçısı - Şəhriyar Məmmədyarov və Vüqar Həşimov ilk "onluq"da yer alıb.
Ən yaxşı 100 şahmatçı sırasında isə Məmmədyarov və Həşimovla yanaşı, Teymur Rəcəbov və Rauf Məmmədovun da adları var. Beləliklə, Məmmədyarov 2772 xalla 9-cu, Həşimov 2760 xalla 10-cu, Rəcəbov 2744 xalla 13-cü, Məmmədov isə 2679 xalla 62-ci yerdə qərarlaşıblar.
Dünyanın ən güclü şahmatçılarının reytinq siyahısına hindistanlı Vişvanatan Anand başçılıq edir. Onun aktivində 2817 xal var. İkinci yerdə norveçli Maqnus Karlsen (2815) yer alıb.