Azərbaycan, Bakı, 2 aprel /Trend, müxbir İ.İzzət/
2013-ci ilin mart ayı ərzində 1 mina/PHS hadisəsi qeydə alınıb. Ay ərzində 2,171,083 kvadrat metr ərazi yoxlanılıb, mina və partlamamış hərbi sursatdan (PHS) təmizlənib. Ay ərzində 822 PHS, 15 ədəd tank və 3 ədəd piyada əleyhinə mina aşkar edilərək zərərsizləşdirilib.
Bu barədə Azərbaycan Ərazilərinin Minalardan Təmizlənməsi üzrə Milli Agentliyinin (ANAMA) mətbuat xidmətindən Trendə bildirilib.
Məlumatda deyilir ki, hazırda minatəmizləmə əməliyyatlarında 484 nəfər minaaxtaran mütəxəssis və 118 nəfər yardımçı heyət iştirak edir. Əməliyyatlara 6 mexaniki minatəmizləmə maşını və 36 minaaxtaran it də cəlb olunub.
Ümumiyyətlə, ANAMA tərəfindən indiyədək cəmi 220,458,894 kvadrat metr ərazi minalardan təmizlənib. Tapılıb zərərsizləşdirilmiş mina və PHS-lərin sayı 679,435-dir.
Agentlik tərəfindən təmizləmə əməliyyatları Ağdam, Ağstafa, Ağcabədi, Füzuli, Bərdə, Tərtər və Abşeron rayonu Kirdağ Palçıq Vulkanları ərazisində, eyni zamanda Bakı şəhəri, Qaradağ rayonu Güzdək qəsəbəsində davam etdirilir.