Bakı. Trend:
Hazırda Azərbaycanda 960-dan çox məktəb yararsız və ya qismən yararsız vəziyyətdədir.
Trend-in məlumatına görə, bunu elm və təhsil nazirinin müavini İdris İsayev noyabrın 10-da Milli Məclisin İctimai birliklər və dini qurumlar, Elm və təhsil, Ailə, qadın və uşaq məsələləri, Səhiyyə, Mədəniyyət komitələrinin birgə iclasında 2023-cü ilin dövlət büdcəsinin müzakirələri zamanı deyib.
Nazir müavini qeyd edib ki, həmin məktəblərdən 434-ü yararsız vəziyyətdədir: “Həmin məktəblərin təmiri və ya tikintisi üçün təxminən 3 milyard manatdan artıq vəsait lazımdır. Təbii ki, təmir işləri daim mərhələli şəkildə həyata keçirilir. Hər il təxminən 100-dən artıq məktəb ya təmir olunur, ya da yenidən inşa edilir. Bu məsələ daim diqqət mərkəzindədir və prioritet istiqamətlərdəndir”, - deyə nazir müavini qeyd edib.