Bakı. Trend:
Dekabrın 15-də Dövlət İmtahan Mərkəzi (DİM) Hakimlərin Seçki Komitəsi ilə birgə hakim vəzifəsinə qəbul olmaq istəyən namizədlər üçün test imtahanı keçirib.
Trend xəbər verir ki, imtahan DİM-in elektron imtahanlar korpusunda təşkil olunub və namizədlər imtahanı başa vurduqda və ya imtahan üçün ayrılan vaxt bitdikdə nəticələrə baxa biliblər. Nəticələr həmçinin sabah gün ərzində DİM-in rəsmi saytında yerləşdiriləcək.
İmtahanda iştirak etmək üçün qeydiyyatdan keçən 329 nəfərdən 4 nəfər imtahana gəlməyib. 211 nəfər isə 60 və daha yüksək bal toplayaraq müsabiqə şərtini ödəyərək növbəti mərhələyə keçib.
İmtahan nəticələri ilə bağlı Apellyasiya Komissiyası 23-25 dekabr tarixlərində saat 14:00-dan 17:00-dək Dövlət İmtahan Mərkəzində (Bakı şəhəri, Akad. H.Əliyev küçəsi, 299) fəaliyyət göstərəcək.