Azərbaycan, Bakı / Trend müxbir S.İlhamqızı/ Azərbaycan jurnalistlərinin cümə günü keçiriləcək toplantısında sənəd qəbul olunacaq. Bu barədə "Gündəlik Azərbaycan" qəzetinin redaktoru Şahvələd Çobanoğlu məlumat verib.
Onun sözlərinə görə, sənəddə Azərbaycan mətbuatının problemlərinin həlli, ağır durumdan çıxması üçün tələblər əks olunacaq. Sənəd hakimiyyətə, həmçinin beynəlxalq təşkilatlara ünvanlanacaq.
Qəzet redaktoru onu da deyib ki, Azərbaycan mətbuatının bugünkü durumu, problemlərinə həsr olunan böyük bir forum keçiriləcək. Həmin tədbirə beynəlxalq təşkilatların nümayəndələri, beynəlxalq jurnalist qurumları, xarici jurnalistlər dəvət olunacaq. Forumun keçirilmə vaxtına gəldikdə, Çobanoğlu bildirib ki, bu, geniş tərkibli tədbir olduğundan hazırlıqlar sentyabra qədər davam edə bilər. Amma tədbirin 22 iyul - Milli Mətbuat Günü ərəfəsində keçirilməsi də mümkündür.
Hazırda Azərbaycanda yeddi jurnalist həbsdədir, bir neçə qəzet maddi problemlər və ofisindən çıxarılması səbəbindən çapını dayandırıb, bəzi qəzetlərin bank hesabına həbs qoyulub.