Azərbaycan, Bakı, 7 noyabr /Trend/
İngiltərənin "Çelsi" komandasının Braziliya əsilli forvardı Dieqo Kosta İspaniya millisinə kömək edə bilməyəcək.
Trend-in xarici KİV-ə istinadən verdiyi məlumata görə, forvard İspaniya yığmasının qarşıdakı iki oyununa çağırılmayıb.
Belə ki, ispanlar Avropa çempionatının seçmə mərhələsi çərçivəsində noyabrın 15-də evdə Belarusu qəbul edəcək, 3 gündən sonra isə Almaniyaya qarşı yoldaşlıq oyununa çıxacaqlar.
İspaniya millisinin baş məşqçisi Visente del Boske D.Kostanın qasıq nahiyəsindən aldığı zədədən yenicə sağaldığını əsas gətirərək onu yığmanın heyətinə dəvət etməyib: "Millinin həkimləri "Çelsi"li həmkarları ilə təmasdadırlar və onlar Kostanın istirahət etməli olduğu qənaətindədirlər".