Bakı. Trend:
Azərbaycanla Qazaxıstan ikitərəfli münasibətlərin inkişafı üçün mühüm potensiala malikdir.
Bu barədə Qazaxıstanın ticarət və inteqrasiya nazirinin müavini Kayrat Torebayev çərşənbə günü Trend-ə müsahibəsində deyib.
O son illərdə əmtəə dövriyyəsində yüksək artımın olduğunu qeyd edib.
"Pandemiya dövründə təəssüf ki, əmtəə dövriyyəsi 170 milyon dollaradək azalmışdı, lakin hazırda yüksək sürətlə artmaqdadır. Məsələn, 2022-ci ildə 100 faiz artımın şahidi olduq, bu il isə ötən illə müqayisədə 40 faiz artım müşahidə edirik", - deyə Torebayev əlavə edib.
Ötən il iki ölkə arasında əmtəə dövriyyəsi 462 milyon dollar təşkil edib. O Azərbaycan və Qazaxıstan iqtisadiyyatının həcmini nəzərə aldıqda bu göstəricini gələcəkdə artırmağın mümkün olduğunu əlavə edib.
Qazaxıstanın yüksək perspektivli hesab etdiyi əsas istiqamətlər kontekstində nazir müavini kənd təsərrüfatı, metallurgiya, neft-kimya və maşınqayırma məhsulları üzrə əmtəə dövriyyəsinin artdığını qeyd edib.
"Mən dünən İqtisadi Zonaların İnkişafı Agentliyinin rəhbərliyi ilə görüşdüm. Biz Azərbaycanda necə böyük perspektivlərin olduğunu görürük və iqtisadiyyatın bir çox sahəsi üzrə əməkdaşlığın genişləndirilməsində maraqlıyıq", - K.Torebayev son olaraq deyib.