Bakı. Trend:
2025-ci ildə Azərbaycan Beynəlxalq Bankının (ABB) səhmlərinin dividend gəlirliliyinin 15 faizdən artıq olacağı proqnozlaşdırılır.
Trend xəbər verir ki, bu barədə ABB-nin idarə heyətinin sədri Abbas İbrahimov ABB-nin səhmlərin emissiyası üzrə yekunlara həsr olunmuş brifinqdə bildirib.
"2024-cü il sentyabrın 1-nə ABB 212 milyon manat xalis mənfəət əldə edib. Bu il bankın səhmdarları üçün dividend gəliri 15,1 faizə çatıb və gələn il bu göstəricinin 15 faizdən çox olacağı gözlənilir", - o vurğulayıb.
Qeyd edək ki, səhmlərin ilk ictimai yerləşdirilməsi (IPO) çərçivəsində ABB-nin səhmlərinə 33 mindən çox investor tərəfindən təxminən 50 min ərizə təqdim edilib. Beləliklə, səhmdarların sayı 1,794-dən 35,104-ə yüksəlib. ABB-nin səhmlərinə tələbin əvvəlki dövrlə müqayisədə 7,8 faiz artdığı bildirilir. Eyni zamanda, ABB-nin səhmlərinə olan ərizələrin 84 faizi rəqəmsal kanallar vasitəsilə təqdim edilib.
