Bakı. Trend:
Mənzil İnşaatı Dövlət Agentliyi (MİDA) yeni yaşayış kompleksinin tikintisi ilə bağlı işlərə başlayır.
Trend-in əldə etdiyi məlumata görə, agentlik yeni yaşayış kompleksinin Bakının Suraxanı rayonunun Hövsan qəsəbəsinin qərb hissəsində 5,83 ha torpaq sahəsində inşa edilməsini planlaşdırıb.
Məlumata görə, artıq MİDA yaşayış kompleksinin tikintisi ilə əlaqədar şəhərsalma əsaslandırılması, tikinti layihəsinin hazırlanması və müəllif nəzarətinin aparılması işlərini yekunlaşdırıb.
Agentlik sözügedən işlərin icrasını “Azin Construction” Məhdud Məsuliyyətli Cəmiyyətinə (MMC) həvalə edib və müqavilə bağlayıb.
Müqaviləyə əsasən, işlərin icrası ilə bağlı MMC-yə 589 410 manat ödəniş edilib.
Qeyd edək ki, MİDA-nın müqavilə bağladığı “Azin Construction” MMC 2016-cı ildə dövlət qeydiyyatına alınıb. Nizamnamə kapitalı 50 manat olan MMC-nin qanuni təmsilçisi Orucov Orxan Alxan oğludur.