Bakı. Trend:
2025-ci ilin sonuna qədər Türkmənistana məxsus “MonacoSat-1” (Türkmen Alem 52E) peykinin əvəzləyicisinin istehsalına başlanılması planlaşdırılır.
Trend xəbər verir ki, bunu “SSİ-Monaco”nun prezidenti və baş icraçı direktoru İlhami Ayqun Bakıda keçirilən Kosmik Texnologiyalar üzrə Konfransda (Space Technology Conference, STC2025) çıxışı zamanı bildirib.
“2015-ci ildə biz ilk peykimizi – “MonacoSat-1”i buraxmışıq. Biz onun gücünün üçdə iki hissəsini Türkmənistana icarəyə verdiyimizə görə, o, artıq “Turkmen Alem 52E” adı ilə tanınır”, - deyə İlhami Ayqun bildirib.
Onun sözlərinə görə, peykin xidmət müddəti 2030-cu ilə qədər nəzərdə tutulsa da, onu 2028-ci ildən gec olmamaq şərtilə əvəzləmək vacibdir.
“İlin sonunda biz, həmçinin, eyni regionu əhatə edən Ku diapazonunda fəaliyyət göstərəcək əvəzləyici peykin istehsalına başlamağı planlaşdırırıq”, - deyə Ayqun bildirib.
O əlavə edib ki, hazırda şirkət yeni layihələri, o cümlədən, “MonacoSat-2” layihəsini aktiv şəkildə inkişaf etdirməkdədir.