Bakı. Trend:
Məqsədimiz qlobal miqyasda rəqabət apara bilən və ölkənin İKT ixracına töhfə verən mütəxəssislər yetişdirməkdir.
Trend xəbər verir ki, bunu Rəqəmsal inkişaf və nəqliyyat nazirinin müavini Samir Məmmədov bu gün Bakıda keçirilən 49-cu ICPC Beynəlxalq Universitetlərarası Proqramlaşdırma Müsabiqəsinin Dünya Finalının açılış mərasimində çıxışı zamanı deyib.
O bildirib ki, Bakıda keçirilən 49-cu ICPC Beynəlxalq
Universitetlərarası Proqramlaşdırma
Müsabiqəsinin Dünya Finalı sadəcə yarış deyil, o, dünyanın ən
parlaq gənc beyinlərinin görüş nöqtəsidir: "Burada onlar təkcə
yarışmayacaq, həm də bir-birindən öyrənəcək, təcrübə paylaşacaq və
yeni ideyalar qığılcımlandıracaqlar.
Azərbaycan rəqəmsal transformasiyanı milli prioritet elan edib. Bizim baxışımız istedadı inkişaf etdirmək, qabaqcıl bacarıqları gücləndirmək və innovativ, təhlükəsiz, qlobal rəqabətədavamlı rəqəmsal ekosistem qurmaqdır. Bu gün ölkəmizdə gənclərin proqramlaşdırma, süni intellekt, kibertəhlükəsizlik və bir çox digər müasir sahələrdə imkanları genişlənib. Bu baxış əsas milli çərçivələrlə – rəqəmsal inkişaf konsepsiyası, informasiya təhlükəsizliyi və kibertəhlükəsizlik üzrə milli strategiya və süni intellekt üzrə milli strategiya ilə müəyyən olunub".