Azərbaycan, Bakı / Trend müxbir İ.Xəlilova / Azərbaycan Respublikasının prezidenti İlham Əliyevin sərəncamı ilə "Azərbaycan Respublikasının Milli Bankı haqqında" qanunun 12-ci maddəsinə edilən düzəlişlər təsdiq olunub. Bu düzəlişlərə uyğun olaraq, AMB əməkdaşlarının əməyinin ödənilməsi sisteminin formalaşdırılmasında müstəqillik əldə edib.
Düzəlişlərə müvafiq olaraq, AMB əməkdaşlarının məvaciblərinin artırılması ölkənin bank sektorunda əməyin ödənilməsi nəzərə alınmaqla həyata keçiriləcək. AMB nümayəndələrinin fikrincə, düzəlişlər Milli Bankdan ixtisaslı kadr axınının qarşısını almağa imkan verəcək.
"Azərbaycan Respublikasının Milli Bankı haqqında" qanuna əsasən, Milli Bankın rəhbərliyinin məvacibi ölkə prezidenti tərəfindən müəyyən olunur və bu əsasda rəhbərlik digər əməkdaşların məvaciblərini müəyyən edir.
Beynəlxalq təcrübə nəzərə alınmaqla, Mərkəzi Banklara əməyin ödənilməsində müstəqillik verilir.
Beynəlxalq təcrübədə belə bir yanaşma bir çox ölkələrldə, o cümlədən Litva, Ukrayna və Latviyada tətbiq olunur.