Azərbaycan, Bakı, 04 aprel / Trend , Ü.İsmayılova/Azərbaycanın sığorta bazarı Rusiya sığorta şirkətləri üçün maraqlıdır. Bu barədə Rusiyanın "Ekspert RA" Reytinq Agentliyinin Reytinq Maliyyə İnstitutu Departamentinin sığorta şirkətlərinin eksperti Aleksandr Maloletnev cümə günü məlumat verib.
"Lakin onun (Azərbaycan sığorta bazarının) həcmi elə böyük deyil ki, Azərbaycan sığorta bazarına rusiyalı sığortaçıların kütləvi ekspansiyasından danışmaq mümkün olsun"- Maloletnev bildirib.
Azərbaycanda martın 15 -də yeni "Sığorta fəaliyyəti haqqında" Qanun qüvvəyə minib. Qanuna əsasən, xarici sərmayəçilərin şirkət kapitalında 49 faizlik limit iştirakı ləğv olunub.
"Rusiyalılar tərəfindən Azərbaycan sığorta şirkətlərinin alınması üçün potensial obyektlərin maliyyə sabitliyi haqqında informasiya son dərəcə məhduddur" -deyə Maloletnev bildirib.
Ekspert hesab edir ki, Azərbaycan sığortaçılarının məlumat şəffaflığını artırmaq müstəqil beynəlxalq Reytinq Agentliklərinin etibarını qazanmaqla mümkün ola bilər.
Azərbaycan sığorta bazarında 28 sığorta və bir təkrar sığorta şirkəti fəaliyyət göstərir. 2007-ci ilin yekunlarına görə, şirkətlərin yığımlarının ümumi həcmi 35,62 mln. manat ödənişlə 147,2 mln.manat təşkil edib. 2007-ci ilin yekunlarına görə, sığorta bazarının lider onluğuna 5 mln. manatdan 20 mln. manat sığorta göstəricisinə malik şirkətlər daxildir.
Müəlliflə əlaqə saxlamaq üçün elektron ünvan: [email protected]
