Azərbaycan, Bakı, 20 may/ Trend , müxbir İ.Xəlilova/ Azərbaycanın Əmlakın İdarə Edilməsi üzrə Dövlət Komitəsi "Kapital Bank" ASC-nin kapitalında dövlət payının hüquqi və fiziki şəxslərə satılması barədə müqavilələr imzalayıb. Bu barədə çərşənbə axşamı Dövlət Komitəsindən məlumat verilib.
Azərbaycan prezidentinin dövlət payından qalan 50 faizin satışına dair 2007-ci il 19 oktyabr tarixli sərəncamına müvafiq olaraq, səhmlərin 85 faizinin (1,020 mln. ədəd) hüquqi, 10 faizinin isə (120 min səhm) fiziki şəxslərə satılması üçün hərraca çıxarılıb.
Hərrac qalibləri ilə müqavilələrin artıq imzalanmasına baxmayaraq, Dövlət Komitəsi bəzi hüquqi rəsmiyyətlərin həlli ilə əlaqədar bankın yeni səhmdarlarına satılan səhm paketlərinə dair informasiyanı açıqlamaqdan hələ ki, imtina edir. Yalnız hüquqi şəxslər üçün nəzərdə tutulan səhm paketlərinin "AtaHolding", "Xalq Bank" və "Azersun Holding"in aldığı məlumdur. Onlar hələ özəlləşdirmənin birinci mərhələsinin yekunu üzrə (Səhmlərin 50 faizinin satışı üzrə) "Kapital Bank"ın səhmdarları olublar. Müvafiq olaraq, "AtaHolding" və "Xalq Bank" a yrı - ayrılıqda bank səhmlərinin 20 faizinə sahibdir, "Azersun Holding" isə 10 faiz səhm paketinə malikdir.
Azərbaycan Milli Bankı İdarə Heyətinin sədr müavini Rüfət Aslanlının mayın 18-də verdiyi məlumata görə, Milli Bank bankın kapitalında mövcud payın sərmayədarlar tərəfindən cəlb edilməsinə dair razılıq verib. Onun rəyinə görə, bütün müqavilələrin imzalanması iyunun sonunadək başa çatdırılacaq.
Dövlət Komitəsindən onu da qeyd ediblər ki, bu gün bankın kapitalında qalan beş faiz səhmin əmək kollektivinə və onlara bərabər tutulan şəxslərə satışı davam etdirilir.
Satış üzrə nəticələrin təsdiq edilməsi üçün mayın 30-da iştirakçıların ümumi yığıncağı keçiriləcək.
2008-ci il yanvarın 1-ə olan vəziyyətə görə, "Kapital Bank"ın akitvləri 249 466 min manat təşkil edir. Bankın borcları 209 555 min manat həcmində formalaşıb. Bankın 2458 əməkdaşı var.
Mayın 20-nə manatın rəsmi məzənnəsi 0,8262 AZN/USD təşkil edir.
Məqalə müəllifi ilə əlaqə ünvanı: [email protected]
