Azərbaycan, Bakı, 02 oktyabr/ Trend , müxbir N.İsmayılova/ Beynəlxalq Valyuta Fondu (BVF) Azərbaycanın dövlət büdcəsinin iqtisadiyyatın qeyri-neft sektorunda əlavə dəyər vergisi və gömrük rüsumlarından itkilərini qiymətləndirib. 2007-ci ildə bu itkilər, müvafiq olaraq, potensial gəlirlərin 31,5 və 31,3 faizini təşkil edib, BVF-in "Azərbaycanın qeyri - neft sektorunda mövcud və nəzərdə tutulan vergi sistemi" hesabatında bildirilir.
Ekspertlərin rəyinə görə, bu itkilər vergi güzəştləri və vergi və gömrük idarəetməsi sistemində çatışmazlıqlarla əlaqəlidir.
2007-ci ildə ƏDV- dən potensial gəlirlər 1 791 mln. manat və neft sektorunu çıxmaqla ,ÜDM-in 16,1 faizi səviyyəsində qiymətləndirilib. Müvafiq olaraq, itkilər təxminən potensial gəlirlərin 31,5 faizi səviyyəsində qiymətləndirilir. Vergi güzəştləri hesabına itkilər təxminən 503 mln. manat olub. Vergilərin toplanılması sistemində nöqsanlarla əlaqədar ƏDV gəlirinin itkiləri 2007-ci ildə ÜDM-in (neft məhsullarını çıxmaqla) təxminən 0,6 faizi səviyyəsində qiymətləndirilib. 2006-cı ildə bu göstərici 2,4 faiz olub.
Hesabatda gömrük rüsumlarından gəlirlərin itkilərinin artması qeyd olunur. Gömrük rüsumlarının potensial gəlirinin qiymətləndirilməsi malların idxalına (neft məhsullarını çıxmaqla) və gömrük rüsumlarının 5,7 faiz səviyyəsində təyin edilən orta normasından istifadəyə əsaslanır. 2007-ci ildə gömrük rüsumlarından potensial gəlirlər 233 mln. manat və ya ÜDM - in (neft sektorunu çıxmaqla) 2,1 faizi səviyyəsində qiymətləndirilib. İtkilər 73 mln. manat olub və bunun 42 mln. manatı güzəştlərlə bağlıdır. 2007-ci ildə gömrük idarəetməsində nöqsanlarla əlaqədar itkilər txəminin 31 mln. manat (neft məhsullarını çıxmaqla ÜDM-in 0,3 faizi) qiymətləndirilib. 2006 - cı ildə bu rəqəm 8 mln. manat (ÜDM-in 0,1 faizi) olub.
Müəlliflə əlaqə saxlamaq üçün elektron ünvan: [email protected]