Azərbaycan, Bakı, 06 oktyabr/ Trend , müxbir Ü.İsmayılova/ "Azərbaycanın Dövlət Sosial Müdafiə Fondu (DSMF) ölkədə sosial təminat sistemini tamamilə yeniləşdirmək niyyətindədir", - DSMF-in rəhbəri Səlim Müslümov bazar ertəsi Moldovanın Milli Sosial Sığorta Kassasının nümayəndələri ilə ğörüşdə bildirib.
"Sistemin yeniləşdirilməsi özünümaliyyələşdirən sosial sığorta sisteminin tətbiqini nəzərdə tutur", - Müslümov bildirib. Hazırda Azərbaycanda məcburi dövlət sosial sığorta haqlarının toplanması, pensiyaların təyinatı və ödənişi üzrə vahid sistem mövcuddur, sığortaolunanların avtomatlaşdırılmış fərdi uçot sistemi işə düşüb.
Azərbaycan əhalisinin Dövlət Sosial Müdafiə Fondu ilə Moldovanın Milli Sosial Sığorta Kassası arasında görüş zamanı əməkdaşlıq sazişi imzalanıb. Sənədi Azərbaycan tərəfdən Dövlət Sosial Müdafiə Fondunun sədri Səlim Müslümov, Moldova tərəfdən Milli Sosial Sığorta Kassasının prezidenti Mariya Borta imzalayıblar.
Saziş sosial təminat sahəsində informasiya - kommunikasiya texnologiyaları, hər iki ölkədə sosial sığorta və pensiya sistemində islahatların aparılması, əhalinin sosial müdafiəsi sahəsində təcrübə mübadiləsi və birgə seminarlar həyata keçirməyi nəzərdə tutur.
Müəlliflə əlaqə saxlamaq üçün elektron ünvan: [email protected]
