Azərbaycan, Bakı, 31 oktyabr/ Trend , müxbir E.İsmayılov/ Azərbaycanın nəqliyyat naziri Ziya Məmmədov ilə Trend -ın müsahibəsi.
- Nazirlik Bakıda nəqliyyatın intellektual idarəetmə sistemini yaradır. Belə bir sistem Bakıda nəqliyyat gərginliyinin azalmasına nə dərəcədə kömək edəcək?
- Nəqliyyatın intellektual idarəetmə sistemi Bakıda sərnişin daşıma və yol hərəkətinin təşkili ilə bağlı əksər mövcud problemləri aradan qaldıracaq. Sistem üzrə Bakının nəqliyyat hərəkətində bütün artan problemlərin qarşısının alınması üçün lazım olan ən müasir texnologiyalar tətbiq ediləcək.
Sistem sərnişin daşınmasının optimallaşdırılması, marşrutlarda avtobuslar arasındakı intervalların avtomatik tənzimlənməsi, avtobusların hərəkətinin cari vəziyyəti, hərəkət surəti və dayanacaqlara çatmasının müəyyən olunması, sərnişin axını haqqında məlumatların toplanması və gərgin saatlarda avtobusların sayının tənzimlənməsinə imkan verəcək.
Sistem nəqliyyat axınından asılı olaraq işıqforların tam avtomatik idarə olunması, parklanmanın idarə olunması və məsafədən icbari idarəetmə sisteminin tətbiq olunması yolu ilə tıxacların yaranmasının qarşısının alınması və fövqəladə hallar zamanı şəhər nəqliyyatının idarə olunmasının təşkilinə şarait yaradacaq. Sistem yollarda baş verən qəzaları qeydə alacaq.
- Yük dövriyyəsi daima artır. Bu nöqteyi-nəzərdən Ələtdə tikilən yeni liman hansı əhəmiyyətə malikdir? Bu layihənin necə və hansı müddətə reallaşdırılması planlaşdırılır?
- Ələt qəsəbəsinin "Şərq-Qərb" və "Şimal-Cənub" nəqliyyat dəhlizlərinin kəsişməsində, respublikanın əsas avtomobil və dəmir yollarına birbaşa çıxışı olan ərazidə yerləşməsini nəzərə alaraq Bakı Beynəlxalq Dəniz Ticarət Limanının sözügedən əraziyə köçürülməsi Azərbaycan üçün mühüm əhəmiyyət kəsb edir.
Liman kompleksinin TİƏ-si və ilkin dizayner işləri, tenderin əsas şərtləri və texniki tapşırıq hazırlanıb və marağı olan şirkətlərə təqdim edilib. Tenderdə qalib olan şirkət liman kompleksinin işçi layihəsinin mərhələlərlə yerinə yetirilməsini təmin edəcək. Layihənin həyata keçirilməsinı isə 2009-cu ilin birinci rübündən etibarən başlanılacaq.
- Bakıda nəqliyyat gərginliyinin azaldılması məqsədilə Bakı buxtası üzərindən yeni körpünün tikintisi layihəsi hazırlanır. Bu layihənin reallaşdırılması hansı mərhələdədir?
- Mayda Koreya Baş nazirinin Azərbaycana səfəri zamanı Bakı buxtasında dəniz körpüsünün layihələndirilməsi üzrə anlaşma memorandumu imzalanıb. Sənəd Azərbaycan Nəqliyyat Nazirilyi ilə Koreyanın "Dongsung Engineering Co. Ltd" şirkəti arasında imzalanıb.
Sentyabrda Koreya tərəfi layihənin təqdimatını hazırlayaraq Nəqliyyat Nazirliyinə təqdim edib. Təqdimat izlənildikdən sonra Nəqliyyat Nazirliyi layihəyə ilkin rəy və təklifləri təqdim edib. Hazırda Koreya şirkəti tərəfindən rəy və təkliflərin nəzərə alınması istiqamətində müvafiq işlər aparılır.