Azərbaycan, Bakı, 31 oktyabr/ Trend , müxbirlər İ.Xəlilova, İ.Əlizadə/ Azərbaycanın Milli Məclisi "Xüsusi iqtisadi zonalar haqqında" Qanun layihəsini ilk oxunuşda təsdiq edib.
"Azərbaycanda iqtisadiyyatın və qeyri - neft sektorunun bərabər inkişafına təkan verəcək xüsusi iqtisadi zonaların yaradılmasına böyük maraq var", - parlamentin Iqtisadi siyasət daimi komissiyasının rəhbəri Ziyad Səmədzadə iclasın gedişində bildirib.
Avropa, Asiya ölkələrinin əksəriyyətinin, həmçinin, ABŞ - ın xüsusi iqtisadi zonaları var və bu, iqtisadiyyatın qabaqcıl sahələrinin inkişafına, xarici sərmayələrin cəlb edilməsinə və ölkə regionlarının inkişafına imkan yaradır.
Azərbaycanın İqtisadi İnkişaf Nazirliyi Qanun layihəsinin işlənilməsində dünya təcrübəsindən istifadə edib.
Azərbaycan Xəzər regionu və Qafqazda vacib mövqe tutur. Bununla əlaqədar, ölkədə belə zonaların yaradılması üçün böyük potensial var.
Qanun layihəsinə əsasən, xüsusi iqtisadi zonaların (XİZ) yaradılmasında hökumətin funksiyaları yalnız iki istiqamətdə məhdudlaşdırılıb - münasib rejimin və müvafiq infrastrukturun yaradılmasında. Məhdud ərazidə yaradılmış xüsusi iqtisadi zonalarda xüsusi vergi və gömrük siyasəti tətbiq olunur.
[Vergi rejimi ərazidən, infrastrukturun vəziyyətindən və zonanın potensialından, fəaliyyət sahəsindən asılı olacaq. Güzəştlər mənfəət vergisi, ƏDV, gəlir vergisi, eləcə də əmlak vergisini əhatə edə bilər.]
Sahibkarlıq fəaliyyəti ilə məşğul olan rezidentlər dövriyyənin (təqdim edilmiş mal və xidmətlərdən alınmış vəsaitlərin) iki faizi həcmində vergi ödəyəcəklər. Rezidentlər ƏDV-ni sıfır dərəcə üzrə ödəyəcək, gömrük rüsumları kimi digər vergilərdən azad ediləcəklər. XİZ üçün Azərbaycana gətirilmiş aksiz malları üzrə Azərbaycan qanunvericiliyinə müvafiq olaraq, gömrük rüsumları ödəniləcək. İqtisadi zonalarda neft və qaz, tütün və spirtli içkilər istehsal etmək qadağandır.
Qanun layihəsində istehsalat, infrastruktur, innovasiya, qarışıq zonalar, azad ticarət zonalarının yaradılması nəzərdə tutulub. Sistemin çevikliyi üçün sənəddə digər XİZ - in yaradılması imkanları göstərilib. Ələtdə yeni beynəlxalq ticarət zonasının tikilməsi layihəsi infrastruktur XİZ - ə aid edilir.
Azərbaycanda xüsusi iqtisadi zonaların yaradılması ən azı 20 - 25 ilə nəzərdə tutulub. Hər iqtisadi zonanın fəaliyyət müddəti ayrı - ayrılıqda qəbul ediləcək Əsasnamədə göstəriləcək. İqtisadi zonalar üçün operator müsabiqə əsasında seçiləcək.
XİZ - in fəaliyyət müddətinin müəyyən edilməsi Azərbaycan hökumətinin Avropa İttifaqına inteqrasiyası üzrə planları ilə bağlıdır. Aİ üzv ölkələri üçün son müddət kimi 2017-ci ili müəyyən edib ki, bu da Polşanın Aİ-yə daxil olması ilə əlaqədardır. Avropa xüsusi iqtisadi zonaların yaradılması sahəsində birinci olsa da, hazırda bütün Avropa ölkələrində bərabər şərait olması üçün bundan uzaqlaşır. Azərbaycan Aİ - yə daxil olarkən, XİZ - in fəaliyyəti üçün müəyyən güzəştli dövr istəyəcək, - iqtisadi inkişaf nazirliyindən bildiriblər.
Müəlliflə əlaqə saxlamaq üçün elektron ünvan: [email protected]
