Azərbaycan, Bakı, 12 noyabr/ Trend , müxbir Ü.İsmayılova/ Azərbaycan prezidenti İlham Əliyev 2009-cu il yanvarın 1-dən dövlət sərhdələrinin nəzarət - buraxılış məntəqələrində mal və nəqliyyat vasitələrinə baxış zamanı "vahid pəncərə" prinsipinin tətbiqi haqqında fərman verib, - rəsmi mətbuat xəbər verir.
Fərmanda bildirilir ki, "İpək Yolu" və "Şimal-Cənub" nəqliyyat dəhlizlərinin Azərbaycanın vacib bir hissəsi olduğunu nəzərə alaraq, dövlət sərhədlərinin buraxılış gücünün artırılması son dərəcə mühüm əhəmiyyət kəsb edir.
Prezidentin fərmanının bəndlərinə əsasən, malların və nəqliyyat vasitələrinin yoxlanılması zamanı süni maneələrin aradan qaldırılması, idxal - ixrac əməliyyatlarının müasir tələblərə uyğun aparılması üçün Azərbyacan Dövlət Gömrük Komitəsinə tapşırılıb:
- dövlət sərhədinin buraxılış məntəqələrindən keçirilən malların və nəqliyyat vasitələrinin sənədlərinin, o cümlədən malların baytarlıq, fitosanitar, gigiyenik və digər sertifikatlarının (şəhadətnamələrinin) yoxlanılmasını zamanı "vahid pəncərə" prinsipi üzrə vahid dövlət orqanının səlahiyyətlərini öz üzərinə götürmək;
nəqliyyat vasitələrinin baytarlıq qanunvericiliyində müəyyən edilmiş qaydada və müddətdə məcburi dezinfeksiya edilməsi, başqa ölkələrdən gətirilən heyvanların sağlamlığını müəyyənləşdirmək üçün onların təcrid olunmuş halda saxlanılmasının təmin edilməsi məqsədi ilə, müvafiq ərazi dövlət baytarlıq müfəttişinə məlumat verilməsi, beynəlxalq avtomobil daşımalarını yerinə yetirən nəqliyyat vasitələrinə sərhəddə "İcazə" blanklarının verilməsi və buna görə dövlət rüsumunun alınması.
Müəlliflə əlaqə saxlamaq üçün elektron ünvan: [email protected]
