Azərbaycan, Bakı, 27 noyabr/ Trend , müxbir İ.Xəlilova/ "Azərbaycan Milli Bankı (AMB) banklarda, onların biznesinə adekvat olan risklərin düzgün idarə edilməsi sisteminin formalaşdırılmasına nəzarəti gücləndirir", - AMB - nin Kredit Təşkilatlarının Fəaliyyətinə Nəzarət Departamentinin rəhbəri Rəşad Orucov məlumat verib.
Onun sözlərinə görə, hazırda bank aktivlərinin 65 faizi kredit portfelinin payına düşür.
"Hazırki vəziyyətdə bu, normal göstərici hesab olunur;banklar vəsaitləri daha çox gəlirli aktivlərdə yerləşdirməyi üstün tuturlar, - Orucov bildirib.-- Və bu gün Azərbaycan bazarında ən mənfəətli və daha sürətlə inkişaf edən aktivlər kreditlərdir".
Lakin onun sözlərinə görə, banklarda bu nisbət fərqlənir. Aktivlər və passivlər baxımından bank balanslarının kompozisiyası hər bankın daxili siyasətinə müvafiq olaraq müəyyən edilir. Onlar müstəqil şəkildə əməliyyat siyasətlərini müəyyən etsələr də, orta hesabla, bu göstərici 65 faizə yaxın təşkil edir.
İstehlak kreditləri ümumilikdə bütün bank sisteminin kredit portfelinin 30 faizədək hissəsini tutur. Bəzi banklarda bu rəqəm hətta 60 -70 faizə çatır.
Noyabrın 1 - nə olan vəziyyətə görə, bankların kredit portfeli ay ərzində 1,2 faiz, ilin əvvəli ilə müqayisədə 43,2 faiz artaraq, 6522,7 mln. manat təşkil edir.
AMB bəzi bankların kreditləşdirməni dayandırmaları faktını inkar edərək, iddia edir ki, banklar dünya prosesləri ilə əlaqədar, templəri azaldıblar. Orucov sözlərinin təsdiqi kimi, yalnız noyabr ərzində bankların 400 mln. manat kredit verdiyini və bu vəsaitin 82 mln. manatın istehlak kreditləşməsi, qalanının biznes - kreditlərin payına düşdüyünü qeyd edib. 48 min fiziki şəxs kredit alıcısı olub.
Bank sisteminin ümumi öhdəliklərində əhalinin əmanətlərinin xüsusi çəkisi, orta hesabla, 20 faiz təşkil edir. Orucovun sözlərinə görə, öhdəliklərin diversifikasiyası baxımından bu, normal göstərici hesab edilir.
"Nəzarətçi orqan kimi AMB - nin əsas tələbi bankların ixtisaslaşdıqları bazarın seqmentinə müvafiq düzgün risklərin idarə edilməsi sisteminin yaradılmasıdır, - AMB - nin departament rəhbəri bildirib. - Biz bank sektorundan risklərin adekvat idarə edilməsini tələb edirik".
Noyabrın 1-nə olan vəziyyətə görə, fiziki şəxslərin ölkənin bank sistemindəki əmanət portfeli ay ərzində 5,1 faiz azalaraq, ilin əvvəlinə nisbətən 22,2 faiz artaraq, 1794 mln. manat təşkil edib.
Noyabrın 27 - nə olan cari mübadilə məzənnəsi -- 0,8079 AZN/USD.
Müəlliflə əlaqə saxlamaq üçün elektron ünvan: [email protected]
