Azərbaycan, Bakı, 04 dekabr/ Trend , müxbir Ü.İsmayılova/ "2008 - ci ilin yekunları üzrə Azərbaycan və Türkiyə arasında mal dövriyyəsi iki dəfə artırılaraq, 2,5 mlrd. dollar həddinə çata bilər", - Türkiyənin xarici ticarət naziri Gürşat Tüzmən Bakıda keçirilən Azərbaycan-Türkiyə biznes-forumunda bildirib.
2007-ci ildə ölkələr arasında 1,3 mlrd. dollar məbləğində ixrac-idxal əməliyyatları həyata keçirilib.
"Dünya maliyyə böhranı hər iki ölkəyə təsir etsə də, Azərbaycan və Türkiyə arasında əməkdaşlıq inkişaf edir. Lakin düşünürəm ki, birgə səylər nəticəsində bu böhranın öhdəsindən gələ və ölkələrin iqtisadiyyatlarının inkişafını təmin edə biləcəyik", - Tüzmən bildirib.
Azərbaycanın iqtisadi inkişaf naziri Şahin Mustafayevin sözlərinə görə, ölkə infrastruktur layihələrində, elektrik stansiyaları, soyuducu kameraların tikintiisndə, kənd təsərrüfatı, turizm sahəsində və iqtisadiyyatın digər sahələrində qarşılıqlı əməkdaşlıqda maraqlıdır.
Yanvar-sentyabrda Azərbaycan və Türkiyə arasında mal dövriyyəsi 1,1 mlrd. təşkil edib. Bunun 552 mln. dolları Azərbaycandan ixracın, 590 mln. dolları Türkiyədən idxalın payına düşüb, - nazir qeyd edib.
Doqquz ay ərzində ÜDM - in artım templəri 15 faiz təşkil edib, adambaşına daxili məhsul 13,7 faiz - 4400 dollaradək artıb. Oktyabrın 1-nə ölkənin valyuta ehtiyatları 2,3 dəfə artımla 18 mlrd. dollara çatıb. Bu dövrdə Azərbaycan iqtisadiyyatına sərmayələr 18,5 faiz - 9 mlrd. dollaradək artıb.
Türkiyənin xarici ticarət naziri Gürşat Tüzmənin səfəri çərçivəsində keçirilən Azərbaycan -Türkiyə biznes-forumunda enerji, nəqliyyat, tikinti, kənd təsərrüfatı, telekommunikasiya, maliyyə sahələrini və digər sektorları təmsil edən 90 türkiyəli və 200 azərbaycanlı sahibkar iştirak edir.
Müəlliflə əlaqə saxlamaq üçün elektron ünvan: [email protected]
