Azərbaycan, Bakı, 05 may / Trend , müxbir N.İsmayılova /
Asiya İnkişaf Bankı (AİB) idarəçilərinin İndoneziyanın Denpasar şəhərində keçirilən 42-ci illik iclasında Azərbaycanın maliyyə naziri Samir Şərifov da iştirak edir. Şərifov ölkənin Bankdakı alternativ idarəçisidir. Əsas idarəçi isə iqtisadi inkişaf naziri Şahin Mustafayevdir.
Toplantıda Asiyanın və başqa regionların 67 ölkəsi dünya maliyyə-iqtisadi böhranının təsirinin aradan qaldırılması məqsədilə həyata keçirilən siyasət haqda informasiyaları mübadilə edirlər.
Maliyyə naziri Azərbaycan iqtisadiyyatının dünya maliyyə böhranı şəraitində inkişafı və onun neqativ təsirindən qorunması məqsədilə aparılan siyasət haqda danışıb.
İclasın gedişində Şərifov AİB prezidenti Xaruxiko Kurodo və bankın Mərkəzi və Qərbi Asiya regionundakı departamentinin direktoru Xuan Miranda ilə görüşüb. Görüşlərdə AİB-in maliyyə dəstəyi ilə Azərbaycanda müxtəlif infrastruktur sahələrində həyata keçirilən layihələrin cari durumu, eləcə də əməkdaşlıq çərçivəsində planlaşdırılan yeni layihələr müzakirə edilib.
Nazir həmçinin Dünya Bankının prezidenti Şiqeo Katsu ilə də görüşüb. Görüşdə DB və Azərbaycan arasında əməkdaşlıq məsələləri, o cümlədən onun yeni istiqamətləri müzakirə edilib.
AİB 1966 - cı ildə yaradılıb və 67 üzvü var. Bankın mənzil-qərargahı Manilada yerləşir. Azərbaycan AİB üzvlüyünə 22 dekabr 1999-cu ildə qəbul edilib və ölkənin bankın kapitalındakı iştirak payı 0,5 faizdir.
AİB aparıcı səhmdarları Yaponiya və ABŞ (ümumi səhmdar kapitalının 31,2 faizi), Hindistan və Çin (12,8 faiz), Avstraliya, Cənubi Koreya, Kanada (16 faiz) və baçqalarıdır.
Məqalə müəllifi ilə əlaqə ünvanı: [email protected]
