Azərbaycan, Bakı, 11 avqust / Trend , müxbir İ.Xəlilova /
Asiya İnkişaf Bankı (AİB) və Azərbaycan hökuməti avqustun 14-15-də Bakıda Azərbaycanda su təchizatı və kanalizasiya sisteminin bərpasına 600 milyon dollaradək həcmdə multitranş maliyyələşməsi (MFF) və ilkin layihə üzrə kredit müqaviləsi barədə rəsmi danışıqlar aparmağı planlaşdırılar. Bu barədə çərşənbə axşamı bankın Bakı nümayəndəliyindən deyilib.
"MFF-nin ilk növbədə AİB-in direktorlar şurasında sentyabrın sonlarında təsdiqlənməsi gözlənilir", - nümayəndəlikdən deyilib.
75 milyon dollar məbləğində ilk MFF tranşı Ağdaş, Göyçay və Naxçıvanda su təchizatı sisteminin və sanitar xidmətlərin yaxşılaşdırılması layihəsinin qismən ödənilməsi üçün təyin edilib.
"Layihənin tam əhatəsi üçün çox vəsait tələb olunur və gələcək xərclər realizəyə uyğun olaraq MFF hesabına ödənilə bilər", - nümayəndəlikdən deyilib.
Birinci tranşın vəsaiti də Ağdaş, Göyçay və Naxçıvanda su təchizatı sisteminin və sanitar xidmətlərin yaxşılaşdırılması üzrə layihənin bahalaşması ilə əlaqədar yaranan əlavə xərclərin ödənilməsi üçün nəzərdə tutulub. (Əvvəllər layihənin bahalaşmasının Azərbaycan hökumətinin pay iştirakının artırılması hesabına ödənilməsi planlaşdırılırdı).
İkinci tranş təxmini olaraq bu layihənin əhatə dairəsinin genişləndirilməsinə, daha üç şəhəri - Ağcabədi, Beyləqan və Balakəni əhatə etməsinə hesablanacaq.
Üçüncü tranşın Bakı ətrafı su təchizatı və kanalizasiya sisteminin mərkəzləşdirilməsinə ayrılması nəzərdə tutulur.
İlkin layihənin (Ağdaş, Göyçay və Naxçıvanda su təchizatı sisteminin və sanitar xidmətlərin yaxşılaşdırılması üzrə) indiki dizaynı 2004-cü ildə hazırlanıb. Bu dövr ərzində isə tikinti materiallarının qiyməti əhəmiyyətli dərəcədə bahalaşıb, xüsusilə də kanalizasiya hissəsində xərclərin artımı müşahidə olunur. Layihənin əhatə etdiyi rayonlardakı kanalizasiya sistemində Azərbaycan tərəfinin təklif etdiyi müasir qurğuların qurulması da onun dəyərinə təsir edir. Layihə seçilmiş rayonlarda su təchizatı və kanalizasiya sisteminin tam bərpasını nəzərdə tutur.
Layihənin ilkin dəyəri 39,9 milyon manatdır. Layihənin maliyyələşməsi üçün AİB ilkin olaraq 30 milyon dollar kredit ayırıb, 9,9 milyon dollar isə hökumətin payına düşüb.
"Azərsu" SC-nin su layihəsi üzrə məsləhətçisi AICO Consulting Ltd/European Consultans Organization konsersiumudur. Məsləhətçi üç ilə nəzərdə tutulmuş işin detallaşdırılması üzrə hesabat hazırlayıb.
2010-cu ilədək layihənin realizəsi dövründə Ağdaş, Göyçay, Naxçıvan, Ağcabədi, Beyləqan və Balakəndəki infrastrukturların, su təchizatı sisteminin inkişafı üçün struktur dəyişikliyinin keçirilməsi planlaşdırılır.
Məqalə müəllifi ilə əlaqə ünvanı: [email protected]
