Azərbaycan, Bakı, 04 sentyabr / Trend , müxbir Ü.İsmayılova /
Koreyalı ekspertlər Azərbaycanın daşınmaz əmlak bazarının vəziyyətini öyrənirlər. Bu barədə cümə günü Azərbaycan Dövlət Şəhərsalma və Arxiterktura Komitəsindən deyiblər.
"Koreya podratçılarının nümayəndələri Koreyanın Azərbaycandakı səfirliyinin təşəbbüsü ilə Azərbaycan Dövlət Şəhərsalma və Arxitektura Komitəsində görüş keçiriblər", - strukturdan deyilib.
Koreya nümayəndə heyətinin tərkibinə Koreyanın Azərbaycandakı səfirliyinin konsulu Kim Yonq Seoq və Koreya Beynəlxalq Podratçılar Assosiasiyasının və Hanmiparsons şirkətinin menecerləri daxildir.
Görüş zamanı qonaqlar Azərbaycanın tikinti-investisiya siyasətinin əsas istiqamətləri, tikinti və layihə bazarının hazırki vəziyyəti, əsas kapitala investisiya qoyuluşunda dövlət mülkiyyətinin xüsusi çəkisinin artmasının səbəbləri, eləcə də regionların sosial-iqtisadi inkişafı barədə dövlət proqramlarının əhəmiyyəti barədə məlumatlandırılıblar.
Azərbaycan Dövlət Şəhərsalma və Arxitektura Komitəsi ilə Koreya Beynəlxalq Podratçılar Assosiasiyası arasında əlaqələrin genişləndirilməsi və dərinləşdirilməsi məqsədilə 2007-ci ildə qarşılıqlı anlaşma barədə memorandum imzalanıb.
Məqalə müəllifi ilə əlaqə ünvanı: [email protected]
