Azərbaycan, Bakı, 16 noyabr / Trend , müxbir Ü.İsmayılova/
Azərbaycanda bütün avtonəqliyyat vasitələrinin cəmi 20-30 faizi könüllü olaraq sığortalanıb. Bu barədə bazar ertəsi "Azərsığorta" Dövlət Kommersiya Sığorta Şirkətinin sədr müavini Aftandil Hacıyev bildirib.
"Sığortanın bu cür aşağı göstəricisi ilk növbədə əhalinin sığortaya inamının olmamasından irəli gəlir", - Hacıyev deyib.
Onun sözlərinə görə, avtomobillərin icbari sığortası ümumi avtomobillərin maksimum 70-80 və ola bilsin ki, daha az faizini əhatə edir.
Hacıyev qeyd edib ki, əhalinin etibar etməməsi sığortanın zəif inkişafının yeganə səbəbi deyil. Digər səbəblərə sığorta şərtləri, göstərilən xidmətlərin sayı, bazarda sağlam rəqabət və s. aiddir.
"Azərsığorta" Dövlət Kommersiya Sığorta Şirkəti 1992-ci ildə, Sovet İttifaqı dağıldıqdan sonra keçmiş dövlət sığortasının bazasında yaradılıb. Şirkət ölkənin bütün şəhər və rayonlarında 80 sığorta agentliyinə sahibdir. Şirkət 10 icbari və 27 könüllü sığorta növü üzrə xidmət göstərir. Şirkətin nizamnamə kapitalı üç milyon manat təşkil edir. Yanvar-sentyabr aylarında fəaliyyət yekununa görə şirkət 19,64 milyon manatlıq sığorta haqqı ilə bazarda üçüncü yeri tutub.
Məqaıə müəllifi ilə əlaqə unvanı: [email protected]