Azərbaycan, Bakı, 2 mart / Trend , müxbir E.İsmayılov/
Əlavə yük axınlarının cəlb olunması məqsədilə TRACECA nəqliyyat dəhlizi dəhlizin mərkəzi seqmenti çərçivəsində zəmanətli yük həcmləri üçün güzəştli əmsalların və birbaşa tariflərin tətbiqi imkanlarını nəzərdən keçirir. Bu barədə TRACECA-nın Azərbaycandan olan milli katibi Akif Mustafayev çərşənbə axşamı məlumat verib. Bu məsələyə fevralda Bolqarıstanda keçirilən tariflər üzrə işçi qrupunun iclasında baxılıb.
"İşçi qrupunun iclasında dəhliz iştirakçısı olan 12 ölkə, həmçinin həmin dövlətlərin dəmiryol və dəniz nəqliyyatı nümayəndələri iştirak ediblər. İclas zamanı dəhlizin mərkəzi seqmenti çərçivəsində tariflərə baxılıb. İclasın keçirlməsində əsas məqsəd əlavə yük axınlarının cəlb olunmasıdır. Bu, zəmanətli yük həcmləri üçün müəyyən əmsalların və birbaşa tariflərin tətbiqini nəzərdə tutur, - Mustafayev bildirib. İran iclasda iştirak etməyib, çünki o, yeni iştirakçıdır. İclas zamanı Azərbaycan və Gürcüstandan keçən dəhlizin mərkəzi seqmenti çərçivəsində tariflərə baxılıb.
Mustafayevin sözlərinə görə, işçi qrupunun yekunları üzrə birgə protokol imzalanmayıb. Belə ki, tərəflər yekun razılığa gəlməyiblər. Lakin iclasda mövqelərin yaxınlaşması baş verib. Tam razılığa nail olunması üçün bu məsələnin işçi qrupunun növbəti iclasında müzakirəsi planlaşdırılır. İclas bu ilin aprel-may aylarında Türkiyədə keçiriləcək.
Hazırda TRACECA iştirakçısı olan dövlətlər aşağıdakılardır: Azərbaycan, Bolqarıstan, Gürcüstan, Qazaxıstan, Qırğızıstan, Ermənistan, Moldova, Rumıniya, Tacikistan, Türkmənistan, Türkiyə, Ukrayna. İran dəhlizin yeni iştirakçısıdır.
