Аzərbaycan, Bakı, 30 iyun /Trend, müxbir İ.Хəlilova/
Azərbaycan hökumətinin assosiativ razılığın imzalanması barədə Avropa Komissiyası ilə danışıqları iyulun 16-da üç Cənubi Qafqaz ölkəsi ilə danışıqların aparılması ilə bağlı mayın 10-da Aİ tərəfindən təqdim olunmuş mandat əsasında başlayacaq. Bu barədə çərşənbə günü Azərbaycan xarici işlər nazirinin müavini Mahmud Məmmədquliyev bildirib.
"Danışıqlar Bakıda aparılacaq və hazırda danışıqların ilkin mərhələsində müzakirə üçün göndərilən məsələlərin siyahısını gözləyirik", - nazir müavini deyib.
Danışıqların aparılması üçün Aİ-nin yüksəkvəzifəli nümayəndə heyəti Bakıya gələcək.
Bu günə qədər Azərbaycan Avropa İttifaqı ilə əməkdaşlıq və tərəfdaşlıq haqqında bir saziş əsasında əməkdaşlıq edib.
Avropa ilə assosiativ sazişin imzalanması Azərbaycan, Gürcüstan və Ermənistan üçün azad ticarətin qurulması və insanların rifahında vasitəyə çevriləcək.
"Bu, Aİ ölkələri ilə əməkdaşlığı yeni səviyyəyə qaldıracaq, Azərbaycana Avropa ölkələri ilə vahid azad ticarət zonasını yaratmağa imkan verəcək", - Məmmədquliyev bir müddət əvvəl demişdi.
Aİ ölkələri ilə əməkdaşlığın dərinləşdirilməsi, assosiativ sazişin əsas elementlərindən biri olan viza rejiminin sadələşdirilməsi Avropa bazarına azad çıxış imkanlarına şərait yaradacaq.
2009-cu il sentyabrın 30-da Brüsseldə üç Cənubi Qafqaz ölkəsinin xarici işlər nazirləri Cənubi Qafqaz ölkələri ilə əməkdaşlıq haqqında Avropa İttifaqı Şurasının illik sessiyasında iştirak etmişdilər. Bu görüşdə Qafqaz ölkələrində münaqişələrin həlli və daxili islahatların aparılması üçün effektiv stimul olan Aİ-yə assosiativ üzvlüyün perspektivləri barədə qərar da qəbul olunmuşdu.
